Almaty qalasynda jalpy bílím beretín mektepterdíń ınklyuzıvtí bílím beru salasynda jūmys ísteıtín pedagogteríne arnalǵan bílíktílíktí arttyru kurstary óttí. Oqytu jūmystaryn otandyq jáne sheteldík jetekshí sarapshylar júrgízdí.
Joba Almaty qalasy Bílím basqarmasynyń bastamasymen jáne «TMD elderínde bílím berudí ílgeríletu jóníndegí halyqaralyq qorynyń» ūıymdastyruymen júzege asyryldy.
Oqytu ekí kezeńnen tūrdy: 13–17 qazan aralyǵynda onlaın formatta jáne 27–31 qazan kúnderí oflaın rejımde óttí. Ūıymdastyrushylardyń aıtuynsha, kurstar megapolıstegí mektepterde ınklyuzıvtí bílím berudíń sapasyn arttyruǵa baǵyttalǵan. Oqytuǵa 300 pedagog qatysty, olardyń 100-í — bastauysh synyp mūǵalímderí, al 200-í — pán mūǵalímderí. Kemínde 80 saǵatqa eseptelgen baǵdarlama ayasynda pedagogter erekshe bílím berudí qajet etetín balalardy (EBQ) oqytudyń zamanauı tásílderín meńgerdí.
Kurstyń negízgí maqsaty – pedagogterdíń ınklyuzıvtí tájírıbení ūıymdastyru jáne engízu boıynsha kásíbı qūzyrettílígín arttyru. Atap aıtqanda, pedagogterde ınklyuzıvtí bílím beru turaly júıelí túsíník qalyptastyru, EBQ bar balalarǵa psıhologıyalyq-pedagogıkalyq baǵalau júrgízu algorıtmderín úıretu. Sondaı-aq erekshe qajettílíkterí bar balalarǵa arnalǵan oqu baǵdarlamalary men oqytu ádísterín beıímdeu daǵdylaryn damytuǵa kómek kórsetu.
«Búgíngí tańda árbír bala úshín mektepterde teń bílím alu múmkíndíkterín jasau būrynǵydan da mańyzdy. Būl kurstar – pedagogterímízdíń jūmys barysynda úzdík halyqaralyq ádístemeler men ınnovatsıyalyq sheshímderdí qoldanuyna kómektesetín tájírıbelík qūral», – dedí Almaty qalasy Bílím basqarmasy janyndaǵy Bílím berudegí jańa tehnologıyalar qalalyq ǵylymı-ádístemelík ortalyǵynyń dırektory Ardaq Smaǵūlova.