25 qarasha men 10 jeltoqsan aralyǵynda Almaty qalasynda jáne barlyq Respýblıka aýmaǵynda "Genderlik zorlyq-zombylyqqa qarsy 16 kún belsendi is-qımyl" atty jyl saıynǵy halyqaralyq kampanıa ótýde. Aksıanyń maqsaty - qoǵamnyń nazaryn turmystyq jáne genderlik zorlyq-zombylyq máselesine aýdarý, azamattardyń qorǵaný sharalary týraly habardar bolý deńgeıin arttyrý, sondaı-aq profılaktıka salasynda memlekettik organdar men qoǵamdyq qurylymdar arasyndaǵy yntymaqtastyqty nyǵaıtý.
Aksıa jyl saıyn 25 qarasha - Áıelderge qatysty zorlyq-zombylyqty joıýdyń halyqaralyq kúninde bastalyp, 10 jeltoqsanda - Adam quqyqtarynyń halyqaralyq kúni aıaqtalady. Bul kúnder ár adamnyń erkindikke, qurmetke jáne qaýipsizdikke degen fýndamentaldy quqyǵy bar ekenin sımvoldyq túrde kórsetedi.
Kampanıa aıasynda Almaty qalasynda aqparattyq is-sharalar, halyqpen kezdesýler, dárister, taqyryptyq aksıalar, mamandardyń konsýltasıalary, sondaı-aq profılaktıkalyq reıdter ótkiziledi. Erte kezeńde turmystyq zorlyq-zombylyqty anyqtaý, jábirlenýshilerdi qoldaý jáne táýekel toptarymen jumys isteý máselelerine erekshe kóńil bólinedi.
Almaty qalasy PD Qoǵamdyq qaýipsizdik basqarmasynyń turmystyq zorlyq-zombylyqqa qarsy is-qımyl bóliminiń bastyǵy, polısıa podpolkovnıgi Jadyra Djeleýqyzy Kantarbaevanyń aıtýynsha, mundaı bastamalar qoǵam qaýipsizdigi úshin asa mańyzdy:
"Aksıanyń bastalýy – jaı ǵana formaldylyq emes. Bul kezeńde biz profılaktıkalyq jumysty kúsheıtip, azamattarǵa der kezinde áreket etýdiń jáne qoldaýdyń mańyzdylyǵyn eske salamyz. Turmystyq zorlyq-zombylyq – uzaq ýaqyt boıy jasyryn qalýy múmkin másele. Bizdiń mindetimiz – adamdarǵa kómek bar ekenin, polısıa árqashan janynda ári qorǵaýǵa daıyn ekenin jetkizý", - dedi ol.
Ol sondaı-aq Almaty qalasy PD QQB qyzmetkerleri osy kúnderi halyqpen kezdesýler ótkizip, otbasylardy aralap, túsindirý jumystaryn júrgizip, keńes berip jatqanyn atap ótti:
"Biz qala turǵyndaryn beıjaı qalmaýǵa shaqyramyz. Eger siz zorlyq-zombylyqtyń kýágeri nemese jábirlenýshisi bolsańyz - 102 nómirine habarlasyńyz. Árbir qońyraý mańyzdy, ol qaıǵyly jaǵdaıdyń aldyn alýy múmkin. Tek birlesken kúsh-jiger arqyly biz zorlyq-zombylyq deńgeıin tómendetip, azamattarymyzdyń qaýipsizdigin qamtamasyz ete alamyz", - dep qosty Jadyra Qantarbaeva.
Uıymdastyrýshylardyń aıtýynsha, qoǵamnyń belsendi qatysýy - aksıanyń tabysty ótýiniń negizgi faktory. Halyqtyń aqparattanýy artqan saıyn, kómekke muqtaj adamdardy qorǵaý múmkindigi de joǵarylaıdy.