Almatyda Ekologıa departamentiniń 2025 jylǵy jumysynyń qorytyndysy shyqty. Osy kezeńde 125 tekseris jasalyp, 109 ret ekologıalyq zańnama talaby buzylǵany anyqtalyp, ondaǵan nusqama berildi. Zıandylyqty azaıtyp, qaldyqtardy baqylaý men aýa sapasyn baqylaý baǵyty áli de negizgi basymdyq bolyp qalyp otyr. Almaty qalasy Ekologıa departamentiniń basshysy Dinmuhamed Lesbekov Óńirlik komýnıkasıalar qyzmeti alańynda ótken baspasóz konferensıasynda osylaı dep málimdedi.
Onyń aıtýynsha, 2025 jyly ekologıalyq retteý bólimi «E-lısenzıalaý» portaly arqyly memlekettik qyzmettiń bes túrin kórsetken. Barlyǵy 210 ótinish túsken, olardyń basym bóligi (174) qorshaǵan ortaǵa áserdi baǵalaý (QOÁB) qajettiligin aıqyndaýǵa qatysty boldy. Osy ótinishter boıynsha 24 qorytyndy berildi, ótinishtiń birazyn ıeleri keri qaıtaryp alyp, keıbirinen bas tartty, birnesheýi áli qaralyp jatyr. Qorshaǵan ortaǵa áserdi baǵalaý nátıjesi boıynsha 21 ótinish túsip, onyń 15-i boıynsha qorytyndy berildi. Memlekettik ekologıalyq saraptamaǵa 10 ótinish tapsyrylyp, sonyń biri qorytyndy shyǵarýmen aıaqtaldy. I sanattaǵy nysandarǵa ekologıalyq ruqsat alý úshin 5 ótinish tústi, olardyń úsheýi boıynsha ruqsat berildi. Jyl ishinde keshendi ekologıalyq ruqsattar alý boıynsha ótinishter tirkelmedi.
«Almatyda qorshaǵan ortaǵa eń kóp áser etetin I sanattaǵy 18 nysan jumys isteıdi. Aýany qorǵaý, sý resýrstaryn, jer men jer qoınaýyn saqtaý, flora men faýnany qorǵaý, qaldyqtardy basqarý, osy zamanǵy ekologıalyq tehnologıalardy engizý men ekologıalyq aǵartý sekildi negizgi baǵyttar boıynsha olarmen únemi jumys júrgizemiz», – deıdi Dinmuhamed Lesbekov.
Almaty qalasynyń ekologıalyq máselelerin sheshý jónindegi Jol kartasy aıasynda toǵyz is-shara qarastyrylǵan. Olardyń bir bóligi oryndalyp, qalǵany kezeń-kezeńimen júzege asyrylyp jatyr. Jol kartasynyń negizgi baǵyty jylý energetıkasy kásiporyndary men kólikten shyǵatyn shyǵaryndylardy azaıtyp, aýanyń tabıǵı aınalymyn saqtaýǵa, sapaly kógaldandyrýǵa, lastanýdy baqylaý men qaldyqtardy basqarý júıesin jetildirýge baǵyttalǵan. Jol kartasyn iske asyrýdyń nátıjesi 2026 jylǵy 9 qańtarda ótken eseptik kezdesýde halyqqa usynylǵan bolatyn.
2025 jyly ekologıalyq baqylaýǵa erekshe nazar aýdaryldy. Departament mamandary josparly profılaktıkalyq jumys pen azamattardyń ótinishi boıynsha, sondaı-aq buryn berilgen nusqamalardyń oryndalýyn baqylaý maqsatynda 125 tekserý júrgizdi. Nátıjesinde 109 zańbuzýshylyq anyqtalyp, olardy joıý týraly 36 nusqama berildi.
Jumystyń edáýir bóligin quramynda akkredıttelgen synaq zerthanasy bar zerthanalyq-taldamalyq baqylaý bólimi atqardy. 2025 jyldyń 1–3 toqsandary aralyǵynda I jáne II sanattaǵy nysandardan óndiristik ekologıalyq baqylaý boıynsha 549 esep qabyldandy. Memlekettik ekologıalyq baqylaý ınspektorlarymen birlesip, atmosferalyq aýanyń, stasıonarlyq jáne jyljymaly kózderdiń, sý nysandarynyń, topyraqtyń jáne radıasıalyq jaǵdaıdyń lastanýyn baqylaý maqsatynda 79 tekserý jumystary júrgizildi. Jyl ishinde 101 zerthanalyq tekserý júrgizilip, 332 synama alynyp, 1 413 zerthanalyq anyqtama jasaldy.
Departamentte Almaty qalasynda ekologıalyq zańnamanyń saqtalýyn baqylaý jumystary turaqty negizde jalǵasatynyn, qalanyń ekologıalyq jaǵdaıyn jaqsartý men qorshaǵan ortaǵa túsetin júktemeni azaıtý negizgi mindet retinde bolyp qala beretinin atap ótti.