Almatydaǵy qyzylshamen auyrǵandardyń basym bólígí ekpe almaǵan balalar bolyp otyr.
Almaty qalasy Sanıtarıyalyq-epıdemıologıyalyq baqylau departamentí basshysynyń orynbasary Ásel Qalyqova qazírgí epıdemıologıyalyq ahual men aurudyń aldyn alu barysy turaly Óńírlík kommunıkatsıyalar qyzmetínde ótken baspasóz máslıhatynda osylaı dedí, - dep habarlaıdy Aqshamnews.kz.
Onyń aıtuynsha, aurudyń ósímí byltyrǵy qarashada bastalyp, sol kezde 30 adam tírkelíptí. Jeltoqsanda olardyń sany 142-ge deıín jettí. Jyldyń basynan berí ósím jalǵasyp, qazír qyzylshamen auyrǵan 482 adam tírkelgen.
«Nauqastardyń basym kópshílígí qyzylshaǵa qarsy ekpe almaǵan balalar. Būl ınfektsıyanyń taralyp, auru oshaqtarynyń qalyptasuyna tíkeleı áser etedí. Sondyqtan ekpe aludy elemeuge bolmaıdy», — deıdí Ásel Qalyqova.
Auruy rastalǵandardyń 451-í 14 jasqa deıíngí balalar bolyp shyqty, būl 93,5% degen sóz. Jasóspírímder — 0,4%, eresekter — 6,01%. 100 myń tūrǵynǵa shaqqandaǵy syrqattanu kórsetkíshí 19,8-ge jettí. Eń kóbí Alatau audanynda — 197, Nauryzbaı audanynda — 110, Bostandyq audanynda — 45, Áuezov audanynda — 39, Almaly audanynda — 32, Túrksíb audanynda — 24, Jetísu audanynda — 20 jáne Medeu audanynda — 15 nauqas tírkelgen.
«Nauqastardyń 87,9%-y qyzylshaǵa qarsy egílmegen. Negízgí sebebí — vaktsınatsıyadan bas tartu, medıtsınalyq qarsy kórsetílímder men ekpe jasyna jetpeuí. Būl halyqtyń auruǵa eń beıím toby», — dedí spıker.
Ekpe alǵandar arasynda da qyzylshamen auyrǵan 34 adam tírkelgen, onyń íshínde 33 adam vaktsınatsıyanyń tolyq kursyn almaǵan, bíreuí ǵana tolyq egílíptí. Nauqastardyń eń úlken úlesí 1 jastan 4 jasqa deıíngí balalar men bír jasqa tolmaǵan sábıler. Kontıngent boıynsha auru kóbínese ūıymdastyrylmaǵan balalar arasynda — 72,1%, odan keıín ūıymdastyrylǵan balalar, mektep oqushylary, áskerı qyzmetshíler, jūmyssyz eresekter men studentter arasynda anyqtalǵan.
Infektsıya oshaqtarynyń barlyǵynda epıdemıyaǵa qarsy ís-sharalar júrgízíldí. 4154 baılanysta bolǵan adam anyqtalyp, olar ınkubatsıyalyq kezeń íshínde medıtsınalyq baqylauǵa alyndy. Epıdemıyalyq kórsetkíshter boıynsha qyzylsha, qyzamyq pen parotıtke qarsy baılanysta bolǵan 706 adamǵa vaktsına salyndy. Balabaqshalar men mektepterde súzgílík baqylau engízílíp, kabınette oqytu jaǵy uaqytsha toqtatyldy, jappaı ís-sharalar shektelíp, ekpe almaǵan baılanysta bolǵan balalar oqshaulandy.
«Vaktsınatsıya qyzylsha men onyń asqyndyryp aludan qorǵanudyń jalǵyz tıímdí joly bolyp qala beredí. Vaktsınanyń ár dozasy balanyń ımmunıtetín kúsheıtíp, aurudyń auyr ótu qaupín tómendetedí. Bíz ata-analardy ekpege jauapkershílíkpen qarauǵa shaqyramyz», — dedí Ásel Qalyqova.
Almatyda būryn qyzylshaǵa qarsy ekpe almaǵan 18 jasqa deıíngí balalardy qamtıtyn qosymsha ımmundau jalǵasyp jatyr. Sondaı-aq 6 aıdan 10 aı 29 kúnge deıíngí balalarǵa qosymsha vaktsınatsıya júrgízíle bastady. Byltyrǵy jeltoqsannan bıylǵy aqpanǵa deıín 1720 sábı qamtylyp, būl josparlanǵandardyń 16,1%-yn qūrady. Jyl basynan berí qyzylshaǵa qarsy 4200 bala men jasóspírím ekpe aldy. Josparly vaktsınatsıya ekí ret — 1 jasta jáne 6 jasta tūrǵylyqty jerdegí emhanalarda júrgízíledí.
Mamandar ekpe kúntízbesín saqtau tūraqty postvaktsınalyq ımmunıtet qalyptastyryp, ınfektsıyanyń taramauyna sep bolatynyn atap óttí.
