UAE SWAT Challenge halyqaralyq jarysynda qazaqstandyq arnaıy jasaqtar joǵary daıyndyq deńgeıín kórsetíp, álemníń úzdík komandalarynyń qatarynan kóríndí, – dep habarlaıdy aqshamnews.kz tílshísí Qazaqstan Respublıkasy Ūlttyq ūlany ÍÍM
«Ońtústík» óńírlík qolbasshylyǵynyń baspasóz qyzmetíne sílteme jasap.
Būl bedeldí saıysta elímízdíń arnaıy jasaqtary, sonyń íshínde «Tomırıs» áıelder toby da erekshe sheberlík tanytyp, júldelí oryndarmen oralǵany belgílí.
Qazaqstan qūramasynyń sapynda Qazaqstan Respublıkasy Ūlttyq ūlanynyń áskerı qyzmetshílerí de óner kórsettí. Olardyń qatarynda maıor Dıas Ahmetbaev pen praporshchık Aqyl Novaev bar.Jarystan oralǵannan keıín atalǵan áskerı qyzmetshíler Taldyqorǵan qalasyndaǵy Jaqsylyq Úshkempírov atyndaǵy oblystyq mamandandyrylǵan olımpıadalyq rezervtíń mektep-ınternat-kolledjíníń oqushylarymen kezdesu ótkízdí. Kezdesu barysynda áskerı qyzmetshíler halyqaralyq jarystyń erekshelíkterí, qatysushylarǵa qoıylatyn talaptar jáne komandalyq daıyndyqtyń mańyzy turaly aıtyp berdí.
Oqushylar tarapynan qoıylǵan sūraqtar da az bolǵan joq. Jastar áskerı qyzmettíń qyr-syry, arnaıy jasaqtardyń daıyndyǵy jáne halyqaralyq jarystarǵa qatysu tájírıbesí jónínde qyzyǵushylyq tanytty. Kezdesu erkín formatta ótíp, áskerı qyzmetshíler oqushylardyń barlyq saualdaryna jan-jaqty jauap berdí.
Maıor Dıas Ahmetbaev jastarǵa arnaǵan sózínde:
«Álemdík deńgeıdegí jarystarda jeńíske jetu – tek fızıkalyq daıyndyqtyń emes, tártíptíń, tabandylyqtyń jáne komandalyq ruhtyń nátıjesí. Eger adam aldyna maqsat qoıyp, soǵan júıelí túrde eńbektense, kez kelgen bıíktí baǵyndyruǵa bolady», – dep atap óttí.
Kezdesu sońynda oqushylar áskerı qyzmetshílerge alǵys aıtyp, estelík suretke tústí. Mūndaı taǵylymdy kezdesuler jas ūrpaqty patrıottyq ruhta tárbıeleuge, sondaı-aq olardyń el qorǵany boluǵa degen qyzyǵushylyǵyn arttyruǵa yqpal etetíní sózsíz.
