Almatyda balalardyń rekonstruktıvtík-plastıkalyq hırurgıyasy boıynsha alǵashqy halyqaralyq sheber sabaǵy ayasynda auyr kúıík pen jaraqat saldarynan zardap shekken jetí balaǵa ota jasaldy, – dep habarlaıdy aqshamnews.kz tílshísí.
Būl turaly Almaty qalasy Qoǵamdyq densaulyq saqtau basqarmasynyń ókílderí aıtty.
11–13 mausym aralyǵynda Balalarǵa shūǵyl medıtsınalyq kómek kórsetu ortalyǵynyń dárígerlerí Reseıden kelgen mamandarmen bírlesíp tyrtyq, deformatsıya jáne qozǵalys shekteuí bar kíshkentaı nauqastarǵa kúrdelí otalar júrgízdí. Eń kíshí nauqastyń jasy – 3-te, al eń úlkení – 17 jasta.
Ár balanyń taǵdyry ártúrlí. Bír bala jol-kólík oqıǵasy kezínde avtokólíktíń qatty qyzǵan shyǵaru qūbyryna qysylyp qalyp, auyr kúıík alǵan. Ekínshí nauqas erte jasta qaınaǵan suǵa kúıíp qalǵan bolsa, taǵy bír qyz bala alaqanymen otqa qūlap, arada bírneshe jyl ótken soń kúıík jaraqatynyń saldarymen betpe-bet kelgen.
Jaraqattar jazylǵannan keıín balalardy emdeudíń kelesí mańyzdy kezeńí – buyndardyń qozǵalysyn qalpyna keltíruge, qoldyń qyzmetín jaqsartuǵa jáne zaqymdanǵan aımaqtardyń syrtqy kelbetín túzetuge múmkíndík beretín rekonstruktıvtík-plastıkalyq otalar boldy.
Sheber sabaǵyn ótkízu úshín Almatyǵa Yaroslavl qalasynan joǵary sanatty dáríger, rekonstruktıvtík mıkrohırurg, qol hırurgıyasynyń mamany árí balalar travmatologıyasy jáne ortopedıyasy bólímshesíníń meńgerushísí Tımur Torno keldí.
Ís-shara «Meıírímdílík» eríktí qoǵamy qaıyrymdylyq qorynyń qoldauymen ūıymdastyryldy.
Jalpy mamandar tua bítken patologıyalary, kúıík saldary jáne jaraqattan keıíngí deformatsıyalary bar shamamen 18 balany tekserdí. Onyń íshínde jetí balaǵa ota jasaldy.
Dárígerler tyrtyqtyq kontrakturalardy joyu, írí buyndardyń qozǵalys kólemín qalpyna keltíru, qol men ayaq basynyń deformatsıyalaryn túzetu jūmystaryn júrgízdí.
Balalarǵa shūǵyl medıtsınalyq kómek kórsetu ortalyǵynyń kúıík bólímshesíníń meńgerushísí, balalar hırurgy, travmatolog-ortoped jáne kombustıolog Radja Jūmadíldaevtyń aıtuynsha, zamanauı rekonstruktıvtík tehnologıyalar mūndaı nauqastardyń ómír súru sapasyn edáuír jaqsartuǵa múmkíndík beredí.
«Kúıík bólímshesí reanımatsıya qyzmetímen bírlesíp táulík boıy kúıík alǵan balalarǵa shūǵyl kómek kórsetedí. Negízgí em ayaqtalǵannan keıín ūzaq ońaltu kezeńí bastalady. Josparly túrde emdeudíń ekínshí jáne úshínshí kezeńderíne jatatyn rekonstruktıvtík-plastıkalyq otalar jasaımyz. Jyl saıyn 230-dan astam osyndaı ota júrgízíledí», – dedí maman.
Qazírgí uaqytta ota jasalǵan barlyq balanyń jaǵdaıy qanaǵattanarlyq dep baǵalanuda. Nauqastar qajettí otadan keıíngí em qabyldap jatyr jáne auruhanadan shyǵaryluǵa daıyndaluda. Alda olardy ońaltu kursy men mamandardyń tūraqty baqylauy kútíp tūr.
Ótkízílgen sheber sabaǵy Almatydaǵy osy baǵyttaǵy alǵashqy joba boldy jáne qazaqstandyq dárígerlerge kúıík saldarynan zardap shekken balalardy emdeudíń jańa tásílderín meńgeruge múmkíndík berdí. Oqytuǵa Almaty, Shymkent jáne Atyrau qalalarynan kelgen onǵa juyq maman qatysty.
Balalarǵa shūǵyl medıtsınalyq kómek kórsetu ortalyǵy ókílderíníń málímetínshe, rekonstruktıvtík-plastıkalyq hırurgıyany damytu Qazaqstannyń ár óńíríndegí balalarǵa joǵary tehnologıyalyq medıtsınalyq kómektí shetelge jíbermeı-aq kórsetuge múmkíndík beredí.