Almatyda 266 myńnan astam bala qosymsha bílímmen qamtylǵan. Būl qaladaǵy mektep oqushysynyń jalpy sanynyń 85%-y, – dep habarlaıdy aqshamnews.kz tílshísí.
Óńírlík kommunıkatsıyalar qyzmetínde Bílím basqarmasynyń basshysy Sáken Aralbaev osylaı dep habarlady.
Qalada qazír 20 memlekettík pen 111 jekemenshík qosymsha bílím beru ūıymy jūmys ísteıdí. Áleumettík tūrǵydan osal sanattaǵy balalardy tegín úıírmeler men sektsıyalarmen qamtuǵa kóp kóńíl bólíníp jatyr.
Spıkerdíń aıtuynsha, memlekettík bílím beru tapsyrysy bilimalmaty.kz portaly arqyly júzege asady. Memlekettík qosymsha bílím beru ūıymdarynda shamamen 38 myń bala bílím alsa, jekemenshík mekemelerde 10 myńnan astam bala qamtylǵan. 218 myńnan astam oqushy mektep janyndaǵy úıírmege qatysady.
Sońǵy jyldary Almatyda balalardyń osy zamanǵy shyǵarmashylyq ortalyǵynyń jelísí qarqyndy damyp keledí. Máselen, 2023 jyly Alatau men Nauryzbaı audanynda robototehnıka, STEM men IT baǵyty boıynsha ekí ınnovatsıyalyq shyǵarmashylyq ortalyǵy ashyldy. Olardyń árqaısysy 5 myń balany qamtuǵa arnalǵan.
2024 jyly №8 balalar muzyka mektebí 500 oryndyq jańa ǵımaratqa ıe boldy.
«2025 jyly ǵylymı, shyǵarmashylyq pen sporttyq baǵytty qamtıtyn “Shabyt” pen “Samǵau” deıtín balalardy damytu ortalyǵy óz jūmysyn bastady. Olardyń árqaısysy 2 500 balaǵa arnalǵan», – dedí Sáken Aralbaev.
Sonymen qatar, bıyl Balalardy qorǵau kúní qarsańynda Sayaly shaǵyn audanynda qalada balamasy joq ınnovatsıyalyq «Jíger» shyǵarmashylyq jáne damu ortalyǵy ashyldy.
Jyl sońyna deıín osyndaı úlken ortalyqty Túrksíb audanynda da ashu josparlanǵan. Sáken Aralbaevtyń aıtuynsha, mūndaı mekemeler jelísín damytu balalardyń tūrǵylyqty jeríne qaramastan bírdeı sapaly qosymsha bílím aluyna múmkíndík beredí.