Almatyda 2026–2027 jylǵy oqu jylyna bírínshí synypqa qūjat qabyldap jatyr, – dep habarlaıdy aqshamnews.kz tílshísí.
Būl turaly Óńírlík kommunıkatsıyalar qyzmetínde ótken brıfıngte Almaty qalasy Bílím basqarmasynyń basshysy Sáken Aralbaev málímdedí. Onyń aıtuynsha, jańa oqu jylynda qala mektepteríne shamamen 31 myń bírínshí synyp oqushysyn qabyldau josparlanyp otyr eken.
«Qalanyń 214 memlekettík mektebínde bírínshí synypqa qabyldaıdy. 10 mausymda bastalǵan qabyldau nauqany Qazaqstan Respublıkasynyń qoldanystaǵy zańnamasyna saı júrgízílíp jatyr», – deıdí spıker.
Qūjat tapsyruǵa elektrondyq úkímettíń egov.kz portalyn paıdalanady. Ata-analar mekteptíń ózíne baryp ta qaǵaz júzínde qūjat tapsyra alady.
Bírínshí synypqa qabyldau ata-analardyń nemese zańdy ókílderdíń ótíníshí negízínde, eshqandaı qabyldau emtıhandarynsyz júzege asady. Mektepke qabyldau kezínde sol bílím beru ūıymyna bekítílgen aumaqta tūratyn balalarǵa basymdyq beríledí.
Sondaı-aq 3:1 qaǵıdaty qoldanylady. Oǵan sáıkes, mıkrouchaskege jatpaıtyn bír balaǵa mekteptíń qyzmet kórsetu aumaǵynda tūratyn úsh bala qabyldanady.
«Tūrǵylyqty mekenjaıdy rastau memlekettík aqparattyq júıelermen ıntegratsıya arqyly avtomatty túrde júzege asyrylady. Būl rette balanyń tūrǵylyqty jerí boıynsha tírkeluí míndettí emes, zańdy ókílderíníń bíríníń tírkeude boluy jetkílíktí», – dep atap óttí Sáken Aralbaev.
Bílím basqarmasynyń málímetínshe, ótken jylǵy qabyldau nauqany barysynda 38 myńnan astam ótínísh qabyldanyp, bírínshí synyptarǵa 29 561 bala qabyldanǵan. Sonymen qatar, qazaq tílínde oqytatyn synypqa qabyldanǵan oqushylar sany da ósíp keledí.
Mekeme ókílderí ótíníshtíń kezegí men bílím beru ūıymdaryndaǵy bos oryndardyń boluyna qaraı qabyldau júrgízíletínín eske saldy.