"Astana" alańynda Almaty qalasy polısıa departamentiniń bastyǵy Arystanǵanı Zapparov jańa jyl merekeleri kezeńinde qoǵamdyq tártipti qamtamasyz etýge jumyldyrylǵan polısıanyń keshendi kúshteriniń biryńǵaı saptyq jıynyn ótkizip, jeke quramǵa jaýapty ári adal qyzmeti úshin alǵys aıtty, - dep habarlaıdy Aqshamnews.kz.
Saptyq jıynǵa patrúldik jáne ákimshilik polısıa bólimsheleriniń qyzmetkerleri, ýchaskelik ınspektorlar, kóshi-qon qyzmeti, arnaıy maqsattaǵy bólimsheler, sondaı-aq Qazaqstan Respýblıkasy Ulttyq ulanynyń áskerı qyzmetshileri qatysty. Jeke quramǵa qoǵamdyq qaýipsizdikti saqtaý, quqyq buzýshylyqtardyń aldyn alý jáne buqaralyq is-sharalar ótetin oryndarda qala turǵyndarynyń tynyshtyǵyn qamtamasyz etý mindetteri júkteldi. Jıyn barysynda sóz sóılegen polısıa departamentiniń bastyǵy mereke kúnderi polısıa qyzmetiniń mańyzy aıryqsha artatynyn atap ótti.
- Jańa jyl merekeleri kezeńinde polısıa qyzmetkerlerine júkteletin jaýapkershilik birneshe ese kúsheıedi. Sizderdiń úılesimdi eńbekterińizdiń, joǵary kásibılikterińiz ben tártipke beriktikterińizdiń arqasynda qalada qoǵamdyq tártip pen qaýipsizdik qamtamasyz etilip, azamattardyń óz quqyqtarynyń qorǵalýyna degen senimi nyǵaıa túsýde. Árqaısyńyzǵa qyzmettik boryshqa adaldyqtaryńyz ben zań men tártip qaǵıdattaryna beriktikterińiz úshin shynaıy alǵysymdy bildiremin, - dedi Arystanǵanı Zapparov.
Qazirgi ýaqytta buqaralyq is-sharalar ótetin oryndarǵa, qoǵamdyq keńistikterge, kólik toraptaryna jáne jol ınfraqurylymyna erekshe nazar aýdarylýda. Jol qozǵalysy qaýipsizdigin qamtamasyz etý jáne quqyq buzýshylyqtardyń aldyn alý baǵytyndaǵy baqylaý kúsheıtildi.
- Patrúldik ekıpajdar men jaıaý jasaqtardyń sany arttyrylyp, jedel áreket etý jáne barlyq bólimsheler arasyndaǵy ózara is-qımyl kúsheıtildi. Árbir qyzmetker quqyq buzýshylyqtardyń aldyn alýǵa jáne azamattarǵa kómek kórsetýge baǵdarlanǵan. Basty maqsatymyz — almatylyqtar men qala qonaqtarynyń Jańa jyldy tynysh ári qaýipsiz qarsy alýy, — dep atap ótti alyp shahardyń bas polıseıi.
Jańa jyl túni Almaty qalasynda qoǵamdyq tártipti qamtamasyz etýge polısıanyń myńdaǵan qyzmetkeri men Ulttyq ulannyń áskerı qyzmetshileri tartyldy. Kezekshilik táýlik boıy uıymdastyrylyp, barlyq qyzmettiń úılestirilýi jedel basqarý ortalyǵy arqyly júzege asyrylýda. Almaty qalasy polısıa departamenti qala turǵyndary men qonaqtaryn qoǵamdyq qaýipsizdik talaptaryn saqtaýǵa jáne aınalasyndaǵylarǵa qurmetpen qaraýǵa shaqyrady.