Nauryz aıynyń basynda Belgıyada shyǵatyn Porschist jurnaly Qazaqstanǵa arnalǵan arnaıy sanyn ūsynady, - dep habarlaıdy Aqshamnews.kz.
Basylymda eldíń bes qalasy – Astana, Almaty, Shymkent, Túrkístan jáne Baıqońyr qamtylǵan. Árqaısysy ózíndík mádenıetí, sáulettík kelbetí jáne aıqyn vızualdy estetıkasy bar derbes turıstík baǵyt retínde tanystyrylady. Būl turaly Almaty qalasy Turızm basqarmasynyń ókílderí aıtty.
Arnaıy shyǵarylymnyń negízgí ózegí – Qazaqstannyń eń írí megapolısí Almaty qalasy. Mūnda zamanauı qalanyń serpíndí yrǵaǵy asqaq taulardyń aıbyndy kórínísímen úılesím tabady. Basylym nazarynda qalanyń aıshyqty qoǵamdyq keńístíkterí, sáulet nysandary, mádenı ortasy men Íle Alatauynyń panoramalary boldy. Būl kóríníster Porsche avtomobılderí úshín áserlí fonǵa aınalyp, vızualdy hıkayalar arqyly Almatynyń aıryqsha bolmysyn – stıl men gastronomıyanyń, kreatıvtí ındustrıya men belsendí turızmníń qalasyn pash etedí.
Arnaıy sannyń túsírílím jūmystary 2025 jyldyń jazynda óttí. Porschist komandasyn Almaty Tourism Bureau ókílderí qarsy alyp, ūıymdastyrushylyq qoldau kórsetíp, negízgí lokatsıyalardy íríkteuge járdemdestí.
Porschist – Porsche markasynyń jankúıerleríne arnalǵan, halyqaralyq audıtorıyasy bar europalyq baspa jurnaly jáne onlaın-platforma. Jurnal 20 jyldan astam uaqyttan berí shyǵyp keledí. Ár sany belgílí bír elge arnalyp, ony avtomobıl estetıkasy, mádenıetí jáne ómír salty tūrǵysynan tanystyrady.
Qazaqstanǵa arnalǵan būl shyǵarylym halyqaralyq audıtorıyaǵa eldí jańa vızualdy qyrynan kórsetíp, Almatynyń Ortalyq Azıya kartasyndaǵy zamanauı, tartymdy árí aıqyn tanylatyn turıstík ortalyq retíndegí áleuetín aıshyqtaı túsedí.