Elímízdíń turıstík árí mádenı ortalyqtarynyń bírí – Shymkent qalasynda tehnıkalyq jáne kásíptík bílím beru ūıymdarynyń pedagogterí men qyzmetkerlerí arasynda ótken respublıkalyq spartakıada óz máresíne jettí, – dep habarlaıdy aqshamnews.kz tílshísí.
Būl dodada almatylyqtardyń mereıí ústem boldy. Almaty qūramasy laıyqty óner kórsetíp qana qoımaı, qatarynan tórtínshí ret eldegí eń úzdík komanda ekenín dáleldedí.
Auqymdy sporttyq shara 2026 jylǵy 1–6 mausym aralyǵynda óttí. Spartakıadany Qazaqstan Respublıkasy Oqu-aǵartu mınıstrlígíníń tapsyrmasymen Túrkístan oblysynyń bílím basqarmasy ūıymdastyrdy.
Jarystyń basty maqsaty – bílím beru salasy qyzmetkerlerí arasynda salauatty ómír saltyn nasıhattau, būqaralyq sportty damytu jáne óńírler arasyndaǵy dostyq qarym-qatynasty nyǵaıtu. Nátıjelerge qaraǵanda, almatylyqtar būl míndetterge úlken jauapkershílíkpen qaraǵany anyq.
Joǵary deńgeıde ūıymdastyrylǵan saltanatty ashylu rásímíne elímízdíń barlyq 18 óńírínen kelgen ókílder qatysty. Qatysushylar arqan tartu, asyq atu, toǵyzqūmalaq, bes asyq sıyaqty ūlttyq sport túrlerínde, sondaı-aq voleıbol, basketbol, futbol jáne ústel tennısí boıynsha synǵa tústí. Barlyq jarys túrlerínde Almaty qūramasy joǵary daıyndyq deńgeıín, ūıymshyldyq pen shynaıy komandalyq ruhtyń úlgísín kórsettí.
«Bízdíń árbír qatysushymyz bar kúsh-jígerín jūmsady. Bíz būl jarysqa jaı ǵana qatysu úshín emes, ózgelerge úlgí kórsetu úshín keldík. Sportqa degen súıíspenshílík adamdardy bíríktíríp, jeńíske jeteleıtínín dáleldeudí maqsat ettík», – dedí Almaty memlekettík bıznes kolledjíníń dırektory Ashat Janbosynov.
Barlyq jarystardyń qorytyndysy boıynsha jalpykomandalyq esepte Almaty qūramasy 17 óńírden kelgen qarsylastaryn artta qaldyryp, bírínshí orynǵa ıe boldy.
Būl – tarıhı jetístík. Almaty komandasy tehnıkalyq jáne kásíptík bílím beru ūıymdarynyń pedagogterí arasyndaǵy respublıkalyq spartakıadanyń tórt dúrkín chempıony atandy. Osylaısha Almaty taǵy da sport pen bílím salasyndaǵy kóshbasshy óńír ekenín aıqyn kórsettí. Būl jeńís – júıelí daıyndyqtyń, qajyrly eńbektíń jáne ortaq maqsatqa degen senímníń jemísí.