Qaladaǵy №15 gımnazıyada Bílím kúní erekshe óttí, – dep habarlaıdy aqshamnews.kz tílshísí.
Dálírek aıtsaq, bıyl bílím ordasyna tarydaı bolyp kírgen, 1-synypqa qabyldanǵan 300 baldyrǵanǵa kítap syılandy.
Búldírshínderge «Kítap oqıtyn ūlt» jobasy men «Kítaphanadan syılyq» aktsıyasy ayasynda kórkem shyǵarmalar tartu ıdeyasyn ūsynǵan – Almaty kítaphanalar júıesí.
A.P.Chehov atyndaǵy Ortalyq qalalyq kítaphana meńgerushísí Aınūr Balaubaevanyń aıtuynsha, osynsha mol kítap qorynyń jınaluyna «Steppe World», «KitapAl Almaty» JK – «KitapAl» baspa dúkení, «Ol-Jas Baspasy» JShS, «Kazformoms», «Astana» kítap baspasy, «Ziyat» kítap dúkení jáne Bayan Bolathanova, Díldár Mamyrbaeva, Sáule Dosjan, Mıras Kesebaev sekíldí qalamgerler úles qosqan.
«Būl kítaptardyń mektep tabaldyryǵyn alǵash attap otyrǵan kíshkentaı búldírshínderímízdíń eń senímdí, ruhanı dosy bolatynyna senemíz. Bízdíń balalardy quantqymyz kelgen ūsynysymyzdy qabyl alǵan №15 gımnazıya dırektory Zoya Qashqynbaıqyzyna alǵys bíldíremíz. Barshamyzdyń maqsatymyz – óskeleń ūrpaqty bala kezínen kítap oquǵa daǵdylandyru, halyq arasynda oqu mádenıetín qalyptastyru, túptep kelgende, bútín el bolyp álemdegí eń kóp kítap oqıtyn on eldíń qataryna enu», – deıdí Aınūr Mūratqyzy.
Osy oraıda aıta ketsek, «Kítap oqıtyn ūlt» – Memleket basshysynyń tapsyrmasymen dúnıege kelgen tyń joba. Būl elímízde tūraqty oqu mádenıetín qalyptastyruǵa baǵyttalǵan zıyatkerlík-aǵartushylyq bastama. Maqsaty – kítap oqudy nasıhattau, synı oılaudy damytu jáne kítapty bílím, shabyt jáne zıyatkerlík ósudíń negízgí kózí retínde nyǵaıtu.
«Prezıdentímíz «Ozyq oıly ūlt boludyń eń tóte joly – kítap oqu. Sondyqtan kítap oqu mádenıetín qoǵamda ornyqtyruymyz kerek» degen bolatyn. Jańa oqu jyly – jańa beles, jańa maqsat, jańa múmkíndíkter. Mektep – tek bílím alatyn oryn ǵana emes, sonymen qatar ár balanyń tūlǵa bolyp qalyptasuyna, óz píkírín erkín bíldíruíne jáne jauapkershílíkpen áreket etuíne múmkíndík beretín orta. Bízge syılanǵan osy kítaptardyń kíshkentaı júrekterge ízgílík, meıírím, adamgershílík dánín sebetíní anyq. Almaty kítaphanalaryna alǵysymyz sheksíz», – deıdí №15 gımnazıyanyń kítaphanashysy Raıhan Myńjasarova.
Balaqaılarǵa syıǵa ūsynylǵan kítaptardyń íshínde Ybyraı Altynsarınníń «Kel, balalar, oqylyq!», Abaı Qūnanbaıūlynyń «Adamdy súı», Ahmet Baıtūrsynūlynyń «Masa», Djek Londonnyń «Aq azu», Rudolf Erıh Raspeníń «Múnhauzen», Rebekka Elıottyń «Meıírím kúní» sekíldí kórkem tuyndylar bar.
Nūrjamal ÁLÍSh