Almaty Hub alańynda halyqaralyq kásípker jáne ınvestor, Waze jáne Moovit negízín qalaushy Urı Levınníń qatysuymen ekí kúndík Building Unicorns vorkshoby bastaldy, – dep habarlaıdy aqshamnews.kz tílshísí.
Onyń sapary GITEX ayasynda ótude - būl álemníń kóptegen elderínen startaptardy, korporatsıyalardy, ınvestorlardy jáne sarapshylardy bíríktíretín írí tehnologıyalyq platforma.
Almaty Hub qaladaǵy startap-ekojúıení damytudaǵy negízgí alańdardyń bírí. Mūnda tehnologıyalyq jobalar qalyptasyp, damıdy, sondaı-aq halyqaralyq deńgeıdegí sarapshylardyń qatysuymen bílím beru jáne akseleratsıyalyq baǵdarlamalar ótkízíledí.
Urı Levın — mıllıondaǵan paıdalanushysy bar jahandyq ónímderdí qūrastyrǵan kásípker jáne ınvestor. Ol negízín qalaǵan Waze navıgatsıyalyq servısín Google kompanıyasy 1,3 mlrd dollarǵa satyp alyp, ony jahandyq karta jáne navıgatsıya ekojúıesíne engízdí. Moovit kólík qosymshasy Intel kompanıyasyna $1 mlrd-qa satylyp, smart city jáne mobıldílík sheshímderíne engízíldí. Búgínde Levın tehnologıyalyq kompanıyalarǵa ınvestıtsıya salyp, halyqaralyq naryqqa shyǵatyn komandalarmen jūmys ísteıdí.
5 mamyr kúní Almaty Hub-ta erte kezeńdegí (early-stage) startaptarǵa arnalǵan ashyq sessıya óttí. Ol kásípkerlerdí ónímdí íske qosu jáne damytu baǵytynda bíríktírdí. Vorkshop barysynda qatysushylar ıdeyadan ónímge ótu, bıznes-model qūru qaǵıdalary jáne startaptyń bastapqy kezeńíndegí negízgí qatelíkterdí talqylady.
«Startap-ekojúıe qatysushylary úshín «bíregeı» startaptar qūruǵa arnalǵan ekí kúndík vorkshop ótkízuge quanyshtymyn. Kompanıyalardy damytudaǵy tájírıbem jobalardyń tabysqa jetu múmkíndígín arttyruǵa kómektesedí. Vorkshop ayasynda bíz máselení valıdatsıyalau, paıdalanushylardy túsínu, product-market fit tabu, ınvestıtsıya tartu, myqty komanda qūru syndy taqyryptardy qarastyramyz. Sondaı-aq, ár startaptyń ósu kezeńíndegí negízgí syn-qaterleríne erekshe nazar audaramyz», — dedí Urı Levın.
6 mamyr kúní jabyq formatta ósu kezeńíndegí (growth-stage) 15 startaptyń qatysuymen sessıya ótedí. Ís-shara bıznes auqymdau, strategıyalyq sheshímder qabyldau jáne halyqaralyq naryqtarǵa shyǵu máseleleríne arnalǵan.
Sessıya barysynda ár jobaǵa praktıkalyq taldau júrgízíledí. Startaptar sheshetín máselesí men maqsatty audıtorıyasy, ūsynylatyn sheshím, damu kórsetkíshterí (klıentter sany, ósu dınamıkasy, auqymdau qarqyny), sondaı-aq operatsıyalyq protsester men jūmys ūıymdastyru tásílderí syndy bıznesíníń negízgí elementterín qysqasha tanystyrady.
Sessıyanyń negízgí maqsaty - ár startaptyń qazírgí damu kezeńíndegí basty máselesín anyqtap, soǵan tereń taldau jasau. Format prezentatsıya emes, naqty keısterdí saraptamalyq talqylauǵa negízdelgen.
Urı Levınníń qatysuymen ótken būl vorkshop óńírlík startap-ekojúıeníń jahandyq tehnologıyalyq kún tártíbíne ıntegratsıyasyn kúsheıtíp, kásípkerlerge halyqaralyq deńgeıde kompanıya qūru men damytu tájírıbesíne qol jetkízuge múmkíndík beredí.