Būl ortalyq Qazaqstan men Ortalyq Azıya keńístígíndegí osy baǵyttaǵy alǵashqy mamandandyrylǵan ǵylymı-bílím beru mekemesí bolyp sanalady, – dep habarlaıdy aqshamnews.kz tílshísí.
2026 jylǵy 1 mausymda Ál-Farabı atyndaǵy Qazaq ūlttyq unıversıtetínde Mı ınstıtutynyń saltanatty ashylu rásímí óttí.
Instıtuttyń ashyluy otandyq neıroǵylymnyń damuyna serpín beríp, elímízdíń ǵylymı-tehnologıyalyq áleuetín arttyruǵa baǵyttalǵan memlekettík bastamalardyń mańyzdy nátıjesíne aınaldy. Ol 2018 jyly qūrylǵan QazŪU-dyń Kognıtıvtík neıroǵylym ortalyǵy negízínde qūrylyp, mı zertteulerí men jańa buyn neıromamandaryn dayarlauda jınaqtalǵan kópjyldyq ǵylymı tájírıbení bíríktírdí.
Instıtut tórt negízgí baǵyt boıynsha jūmys ísteıdí: kognıtıvtík neıroǵylym, mínez-qūlyq neıroǵylymy, esepteu neıroǵylymy jáne neırolıngvıstıka. Zertteuler álemdík deńgeıdegí zamanauı jabdyqtardy paıdalana otyryp júrgízíledí, olardyń qatarynda 3 Tesla magnıttík-rezonanstyq tomograf, ANT Neuro joǵary tyǵyzdyqty EEG júıelerí, funktsıonaldyq jaqyn ınfraqyzyl spektroskopıya (fNIRS) tehnologıyalary, sondaı-aq jasandy ıntellekt pen úlken derekterdí taldau qūraldary bar.
Instıtuttyń negízgí ǵylymı míndetterí adamnyń mıynyń qalypty jáne patologıyalyq damuyn zertteu, kognıtıvtík protsesterdí taldau, neırodegeneratıvtí aurulardyń mehanızmderín anyqtau, emotsıya men sheshím qabyldau úderísterín zerdeleu, kóptíldílík neırolıngvıstıkasyn damytu jáne jańa dıagnostıkalyq árí boljamdyq bıomarkerlerdí ázírleu bolyp tabylady.
Kadr dayarlau baǵytyna erekshe mán berílgen. QazŪU-dyń Bıofızıka, bıomedıtsına jáne neıroǵylym kafedrasynda Qazaqstanda alǵash ret neıroǵylym boıynsha bakalavrıat, magıstratura jáne doktorantura deńgeıíndegí bílím beru baǵdarlamalary júıelí túrde íske asyryluda.
Instıtuttyń negízín qalaushy jáne dırektory – professor Almıra Melsqyzy Kustubaeva, Qazaqstandaǵy neıroǵylym salasynyń jetekshí mamandarynyń bírí, elde neıromamandardy dayarlau júıesín qalyptastyruǵa jáne mı turaly keshendí zertteulerdí damytuǵa eleulí úles qosqan ǵalym.
Mı ınstıtutynyń ashyluy Ál-Farabı atyndaǵy QazŪU-dyń Ortalyq Azıyadaǵy jetekshí zertteu unıversıtetí retíndegí pozıtsıyasyn odan árí nyǵaıtyp, halyqaralyq ǵylymı yntymaqtastyqty keńeıtuge, ınnovatsıyalyq tehnologıyalardy engízuge jáne mı ǵylymdary salasyndaǵy írgelí zertteulerdí damytuǵa jańa múmkíndíkter ashady.
Ál-Farabı atyndaǵy QazŪU-dyń baspasóz qyzmetí