Almatyda áıel men onyń 6 jastaǵy qyzyn asqan qatygezdíkpen ūryp óltírgen aıyptalushyǵa qatysty sot úkímí shyqty. Būǵan deıín de qylmysy úshín sottalǵan er adam būl joly ómír boıy bas bostandyǵynan aıyryldy, - dep habarlaıdy aqshamnews.kz tílshísí Almaty.tv-ǵa sílteme jasap.
Sottalushy men marqūm Aqbota Úserbaı nebárí alty aı ǵana tanys bolǵan. Bıyl 5 qyrkúıekte ekeuíníń arasyndaǵy janjal qandy qylmysqa ūlasqan. Ashu ústínde er adam as úıdegí shoıyn qazanmen áıeldí balasynyń kózínshe ólímshí etíp sabapty. Auyr jaraqat alǵan áıel sol túní auruhanada kóz jūmǵan. Medıtsınalyq saraptama marqūmnyń ashyq bas-mı jaraqatyn alǵanyn, bas súıegíníń bírneshe jerden synǵanyn, mıyna qan qūıylǵanyn rastady.
"Aqbota jáne Erbolqyzy Kórkem anasy úsheuí Aportqa barǵan. Sodan úıíne demalys ornynan qaıtyp kelgen jaǵdaıda artynan Chaltabaev eríp kelíp, renjísíp qalǵan. Ol gazdyń ústínde tūrǵan qazanmen Aqbota men Kórkemdí soqqyqa jyqqan. Alynǵan sausaq ízderí ekspertıza Chaltabaevqa tıesílí ekenín anyqtady", – dedí jábírlenushí tarap Asqar Beısembaev.
Qandyqol mūnymen toqtamaı, marqūmnyń zeınetker anasyn da bírneshe ret ūryp, esínen tandyrǵan. Áıel jansaqtau bólímíne jetkízílíp, bírneshe otadan keıín aman qaldy. Sottalushy mūndaı qatygezdíktí kózben kórgen jalǵyz kuáger 6 jastaǵy qyzdy da sol qazanmen bírneshe ret ūrǵan. Auyr jaraqattan Kórkem es jımastan bírneshe kúnnen soń kóz jūmdy.
"Ómírímníń mání edí ekeuí, ekeuínen aıyrylyp, qazír ne ístep, ne qoıyp júrgenímdí bílmeımín? Kórkemdí óte jaqsy kóretín edím. Kórkem sıyaqty nemere bola ma, bolmaı ma?. Meníń qyzymnyń ómírínde kezdesken zūlym adam bolyp tūr ǵoı. Būl adamnyń qandaı ekenín bílmegen. Qolynda qazanmen mení de ūrdy. Sol kezde qyzymnyń jerde jatqanyn kórdím. Sonda nemerem tyǵylyp tūrǵan eken ǵoı", – dedí marqūm A. Úserbaıdyń anasy Ajar Slamova.
Sonymen qatar, ís materıaldarynda taǵy bír qylmystyq epızod bar. Balanyń shyńǵyrǵan dauysyn estígen páter ıesí esíktí qaǵyp, mán-jaıdy bílmek bolǵan. Alaıda er adam qylmysyn jasyrmaq bolyp, ony da temír qazanmen mańdaı tūsynan ūryp qūlatqan. Keıínnen qanǵa boyalǵan temír qaru Medeu audanyndaǵy tūrǵyn úılerdíń bíríníń qaqpasynyń mańynda jasyrylǵany anyqtaldy.
"Bárí jaqsy, bara beríńíz" dedí. Men "ketpeımín, polıtsıya shaqyramyn" dedím Balam kílttí ákeluge kettí. Sol kezde qolyndaǵy qazandy kórdím, íshí qan-qan bolatyn. Soǵan tańdanyp qarap qalyppyn, basyma qatty soqqy tıíp, esímnen tanyp qalamyn", – dedí jábírlenushí Ásem Isahanova.
Sońǵy sózínde sottalushy ózíne taǵylǵan aıypty joqqa shyǵaryp, qylmys jasamaǵanyn málímdedí. Alaıda saraptama nátıjesínde qanǵa boyalǵan temír qazanda Chaltabaevtyń sausaq ízderí tabylǵany dálel retínde ūsynyldy.
Memlekettík aıyptaushy Boralhan Chaltabaevty asa qatygezdíkpen ekí nemese odan da kóp adamdy qasaqana óltíru jáne adam óltíruge oqtalu baptarymen aıyptady. Sudya Baqytjan Bákírbaev sottalushyny ómír boıy bas bostandyǵynan aıyru jónínde úkím kestí.
"Qylmystyq kodekstíń 99-babynyń 3-bólígí boıynsha ómír boıy bas bostandyǵynan aıyru jazasy taǵaıyndalsyn. Qylmystyq kodekstíń 58-babynyń 4-bólígí erejeleríne saı, qylmystyq qūqyq būzushylyqtardyń jıyntyqtarynda onsha qatań emes jazany neǵūrlym qatań jazaǵa auystyru arqyly Chaltabaevqa ómír boıy bas bostandyǵynan aıyru jazasy taǵaıyndalsyn", – dedí sudya Baqytjan Bákírbaev.
Aıta keteıík, sottalushy būǵan deıín de adam óltírgení úshín 10 jylǵa bas bostandyǵynan aıyrylǵan. Alaıda erterek bosap, probatsıyalyq kezeńde auyr qylmys jasap, 2 adamdy ómírínen aıyrdy.