Қыз зорлағаны үшін 5 жылға сотталған қазақстандық блогер Думан Ерқанат жаза түрінің айыппұлға ауыстырылуына байланысты бостандыққа шықты, – деп хабарлайды aqshamnews.kz тілшісі Stan.kz-ке сілтеме жасап.
Ведомство мәліметінше, сот тағайындаған жаза неғұрлым жеңіл жаза түріне - айыппұлға ауыстырылған. Осыған байланысты Думан Ерқанат қылмыстық-атқару жүйесі мекемесінен шығарылған.
Комитет өкілдері мұндай мәселелерді қарау және тиісті шешім қабылдау тек соттың құзыретіне кіретінін атап өтті. Сондай-ақ айыппұл түріндегі жазаны орындау қылмыстық-атқару жүйесі органдарының міндетіне жатпайтыны айтылды.
Бұдан бөлек, ведомство Әкімшілік рәсімдік-процестік кодекстің 91-бабына сәйкес, егер өтініш беруші уәкілетті органның шешімімен келіспесе, оны заң аясында даулауға құқылы екенін еске салды.
Ал сотталған адамның жеке ісіне қатысты мәліметтер Қазақстан заңнамасына сәйкес жарияланбайды.
Еске салайық, 2023 жылы өзін жәбірленуші ретінде таныстырған қыз блогер тарапынан зорлық көргенін мәлімдеген болатын. Оның сөзінше, 2022 жылғы желтоқсанда қаржылық сауаттылық бойынша кеңес алу үшін Думан Ерқанатпен кездескен кезде оған күш көрсетілген.
Осыдан кейін бойжеткен полицияға арыз жазып, іс сотқа жеткен. 2023 жылғы 13 қыркүйекте сот Думан Ерқанатты «зорлау» бабы бойынша кінәлі деп танып, 5 жылға бас бостандығынан айырды. Сонымен қатар ол жәбірленушіге 3 млн 117 мың теңге өтемақы төлеуге міндеттелген.
Іс материалдарына сәйкес, сот барысында айыпталушы кінәсін мойындап, өкініш білдіріп, жәбірленушіден кешірім сұраған.
Кейін блогер сот шешімімен келіспей, апелляциялық шағым түсірген. Апелляциялық сот алғашқы үкімнің күшін жойып, оны ақтап алған. Алайда кейін Жоғарғы сот бұл ақтау үкімін жойды.
Жоғарғы сот хабарламасында: «Қылмыстық іс материалдарын зерделеу барысында Ерқанаттың кінәсі дәлелденді. Қорғаушының уәждері жиналған дәлелдемелермен жоққа шығарылды», – делінген.