Алматы облысындағы Саты ауылында әсіредіншіл көзқарастағы азамат зираттарды қиратып кеткен, деп хабарлайды aqshamnews.kz.
Көлсай көлдерінің түбінде орналасқан бұл елдімекендегі зиратта белгісіз ер адам бірнеше құлыптасты қиратқан. Қабірлердің қорланғаны туралы видео әлеуметтік желілерде тарап, жұрттың наразылығын тудырды. Кадрларда бейіт басында шашылып жатқан құлыптастар анық көрінеді.
Ауыл тұрғындары бұл әрекетті ислам дініне де, адамгершілікке де жат деп санайды. Қазір жағдайды құқық қорғау органдары мен жергілікті әкімдік бақылауға алып, тексеріс жұмыстарын бастаған. Тиісті органдар аталған азаматтың жеке басы мен оның қандай діни бағытты ұстанатынын анықтап жатыр.