Алаңға 300-ге жуық жас педагог жиналды, деп хабарлайды aqshamnews.kz тілшісі.
Оқу-ағарту министрі Жұлдыз Сүлейменова НЗМ Педагогикалық шеберлік орталығы ұйымдастырған «STEM. AI. Innovation» халықаралық коннектіне қатысушылармен кездесті. Алаңға Қазақстанның барлық өңірінен, сондай-ақ Қытай, Қырғызстан және Өзбекстаннан 300-ге жуық жас педагог жиналды.
Кездесу барысында мұғалімдер жаңа оқу жылында білім беру саласына енгізілетін өзгерістер мен жаңашылдықтар, оқу үдерісінде STEM тәсілдері мен жасанды интеллект мүмкіндіктерін қолдану, сондай-ақ кәсіби даму мәселелері бойынша сұрақтар қойды. Министр жас ұстаздардың сұрақтарына жауап беріп, олардың ұсыныстары мен пікірлерін тыңдады.
Мемлекет басшысы Қасым-Жомарт Тоқаевтың білім беру жүйесін жаңғырту және цифрландыру жөніндегі тапсырмаларына тоқталған министр жас педагогтердің үздіксіз ізденуі, жаңа технологияларды меңгеруі және тәжірибе алмасуы білім сапасын арттыруда маңызды рөл атқаратынын атап өтті.
Жас педагогтер жасанды интеллект құралдары мен заманауи білім беру модельдерін сабақта қолданудың тиімді жолдарын талқылап, қазақстандық және халықаралық сарапшылармен тәжірибе алмасты.
