Ақмола облысы Жібек жолы ауылында бірнеше адамның өліміне қатысты ұсталған күдіктінің бұрын сотталғаны белгілі болды, деп хабарлайды Aqshamnews.kz тілшісі.
Қылмыстық істің кейбір мән-жайын Ішкі істер министрінің орынбасары Санжар Әділов мәлімдеді. Оның айтуынша, күдікті қазір қамауға алынып, сот санкциясымен тергеу изоляторында отыр.
«Күдікті бұрын сотталған. Қазір ол күдікті ретінде танылып, қамауға алынды. Қылмыстық іс бойынша бірнеше жәбірленуші бар екенін растаймын. Қаза тапқандардың барлығы анықталып, олардың жеке басы сәйкестендірілді. Сот-медициналық сараптамалар тағайындалды», – деді министрдің орынбасары Сенат кулуарында.
Еске салайық, 2 наурыз күні Астана маңындағы Жібек жолы ауылында бір отбасының бірнеше мүшесі өлтірілгені туралы ақпарат тараған еді. Бұл оқиға қоғамда үлкен резонанс тудырды.
Марқұмдардың туыстары мен көршілері ұсталған адамның психиатриялық есепте тұрғанын айтқанымен, ІІМ бұл ақпаратты растаған жоқ. Дегенмен күдіктінің бұрын сотталғаны нақтыланды.
Қазіргі уақытта оқиға орнында тергеу-жедел тобы жұмысын жалғастырып жатыр. Ал Ақмола облыстық полиция департаменті әлеуметтік желілер мен мессенджерлерде тарап жатқан түрлі болжамдар мен жалған ақпараттарға сенбеуге шақырды.
Полиция мәліметінше, күдікті қылмыс жасалғаннан кейін көп ұзамай ұсталған. Қылмыстық іс кісі өлтіру фактісі бойынша тергеліп жатыр.
