Бүгін Алматы жоғары азаматтық белсенділік танытып отыр. Көктемгі салқынға қарамастан таңнан бастап мегаполистегі референдум учаскелерінде адамдар легі байқалады. Әсіресе, жас алматылықтар белсенділігімен көзге түсіп отыр. Олардың көпшілігі үшін бұл референдум өміріндегі алғашқы маңызды саяси қадамдардың бірі болды, – деп хабарлайды aqshamnews.kz тілшісі.
№667 комиссияның төрайымы Нұрбану Омарова үдеріс заң талаптарына қатаң сәйкес ұйымдастырылғанын, ал дауыс берушілер үшін барлық жағдай жасалғанын, оның ішінде мерекелік атмосфера мен арнайы фотоаймақтар қарастырылғанын атап өтті.
«Бүгін біздің учаскеде барлық қажетті жағдай жасалған. Сағат 7:00-де дауыс беру басталған сәттен бастап азаматтардың жоғары белсенділігін байқап отырмыз. Комиссия мүшелері мен бақылаушылар жұмысына уақытылы кірісіп, тәртіптің сақталуын қадағалап отыр», – деді ол.
Қаланың көптеген учаскесінде дауыс берушілер үшін шағын мерекелік атмосфера қалыптасқан. Естелік суретке түсуге арналған фотоаймақтар ұйымдастырылып, алғашқылардың бірі болып келгендерге және алғаш рет дауыс беруге қатысқан жастарға символикалық сыйлықтар мен кәдесыйлар табысталып жатыр.
№621 референдум учаскесінде алғашқылардың бірі болып Естияр Мұғалбек келді. Ал биыл алғаш рет дауыс беруге қатысқан жас тұрғын Елнұр Боранғазы бюллетенін алып, дауыс берді. Рәсімнен кейін оларға естелік сыйлықтар табысталды.
№47 учаскеде қала жастары Азамат пен Салтанат алғашқы бюллетень алып, ұйымдастырушылардың тәтті сыйлығына ие болды. Жастардың айтуынша, бұл күн олар үшін жаңа өмірлік тәжірибеге айналды.
«Біз үшін бұл өте маңызды сәт. Елде болып жатқан оқиғалардың бір бөлігі болу қызықты», – деді олар.
Наурызбай ауданы да белсенділіктен қалыс қалмай отыр. Мұнда ауданның 18 жастағы тұрғыны референдум учаскесіне таңертең ерте келген.
«Мен бұл күннің атмосферасын сезініп, ел үшін маңызды оқиғаға қатысу үшін арнайы ерте келдім», – деді бойжеткен.
Түрксіб ауданында да ерекше атмосфера байқалады. Кейбір тұрғындар үшін 15 наурыз екі есе символдық мәнге ие болды, олар дәл референдум өтетін күні 18 жасқа толды. Жаңа ғана кәмелетке толған жастар мұндай күннің ұзақ уақыт есте қалатынын айтады.
Комиссия мүшелерінің айтуынша, учаскелерде жас сайлаушыларға дауыс беру тәртібі түсіндіріліп, барлық қажетті ақпарат беріліп жатыр. Ал естелік кәдесыйлар, шағын сыйлықтар мен фотоаймақтар бұл күннің ерекше атмосферасын күшейтіп, әсіресе алғаш рет дауыс беруге қатысқан жастар үшін ұмытылмас сәтке айналып отыр.