Алматы қаласында Құрылтай депутаттарының сайлауы қарсаңында жастар арасында ақпараттық-түсіндіру жұмыстары жалғасуда, – деп хабарлайды aqshamnews.kz тілшісі.
Белсенді жастар сайлауға қатысу – әрбір азаматтың ел болашағына қосатын нақты үлесі екенін айтып, тұрғындарды өз таңдауларын жасауға шақыруда.
Ақпараттық науқанға қатысып жүрген жастардың бірі – курьер Бижігіт Қуаныш. Оның айтуынша, жастардың сайлауға қатысуы қоғамдағы маңызды шешімдерге өз үлесін қосудың тиімді жолы.
– Менің ойымша, әр адамның дауысы маңызды. Болашағымызға қатысты шешімдер қабылданатын болса, оған бейжай қарамай, өз таңдауымызды жасауымыз керек. Сондықтан жастардың да сайлауға қатысқаны дұрыс, – дейді Бижігіт Қуаныш.
Ол бүгінгі жастардың азаматтық жауапкершілігі елдің ертеңгі дамуына тікелей әсер ететінін атап өтті. Сондықтан әрбір жас сайлаудың маңызын түсініп, белсенділік танытуы қажет деп есептейді.
Бижігіт Қуаныштың айтуынша, ақпараттық науқанның басты мақсаты – тұрғындарға сайлау туралы дұрыс әрі түсінікті ақпарат жеткізу.
– Біз адамдарға сайлау туралы дұрыс ақпарат жеткізгіміз келеді. Ең бастысы – әркім өз таңдауын саналы түрде жасап, дауыс берудің маңызын түсінсе дейміз. Алматы тұрғындарын белсенді болуға шақырамыз, – деді ол.
Жас белсендінің пікірінше, азаматтардың саналы таңдауы қоғамдағы оң өзгерістердің негізін қалайды. Әрбір дауыс елдің болашағына ықпал ететін маңызды шешімдердің қабылдануына өз әсерін тигізеді.
Алдағы уақытқа деген үмітімен бөліскен Бижігіт Қуаныш жастардың ұсыныстары көбірек ескерілетін, халықтың өзекті мәселелері кезең-кезеңімен шешілетін қоғам қалыптасатынына сенім білдірді.
– Жастардың пікірі көбірек ескеріліп, халықтың мәселелері шешімін табады деп сенемін. Болашақта еліміз дамып, жастарға мүмкіндік көп болатын, өмір сүруге жайлы мемлекет болғанын қалаймын, – деді ол.
Құрылтай депутаттарының сайлауы – әрбір азаматтың өз ұстанымын білдіріп, елдің болашағына қатысты таңдау жасайтын маңызды саяси науқан. Алматы жастары тұрғындарды бейжай қалмай, сайлауға белсенді қатысып, өз азаматтық таңдауларын жасауға шақырады.