Алматыда Air Astana компаниясы «Жас Қыран» жол гранттары бағдарламасының үш жылдығын атап өтті, – деп хабарлайды aqshamnews.kz тілшісі.
Әуе компаниясы талантты жастарға арналған «Жас Қыран» бағдарламасының үш жылдық қорытындысын шығарды. 2023 жылдан бастап 364 өтінім түсіп, жол гранттарын 124 қазақстандық пайдаланған. Бағдарлама 7–18 жас аралығындағы жастарға халықаралық конкурстарға, жарыстарға, олимпиадаларға қатысу үшін авиабилеттер ұсынады. Келесі жылдан бастап бұл бастамаға FlyArystan қосылғалы тұр.
– Елдің табысты болуы үшін Қазақстанды жаһандық деңгейде жоғары сатыға көтеруге ұмтылатын жас, дарынды, еңбекқор азаматтардың болуы өте маңызды. «Жас Қыран» бағдарламасы 2023 жылы басталған болатын. Осы уақыт ішінде оған қызығушылық арта түсті. Елдің жас дарындарына кішігірім болса да қолдау көрсетіп, Қазақстан ішінде және одан тыс жерлерде өткен жарыстар мен іс-шараларға сапарларыңызды ұйымдастыруға көмектесе алғанымызға өте қуаныштымыз. FlyArystan тек ішкі нарықта ғана емес, сонымен бірге халықаралық жаңа бағыттарды да ашып, өте жылдам дамып келеді. Осы мүмкіндікті жас дарындарды қолдауға бағыттай отырып, біз «Жас Қыран» бағдарламасына одан да зор серпін береміз, – деді Air Astana компаниялар тобының бас атқарушы директоры Ибрахим Жанлыел.
Айта кеткен жөн, «Жас Қыран» ережесі бойынша бағдарлама жеңімпазының өзі ғана емес, оны алып жүретін ересек адамға да екі бағытта тегін билет беріледі. Өтінімдерді іріктеу берілген құжаттар негізінде жүргізіледі, бірақ қазылар алқасы үшін шешім қабылдауда ең маңыздысы – үміткердің «Неліктен мен грант ала аламын» тақырыбына түсірілген бейнеролигі. Құрамында белгілі педагогтер, журналистер, қайырымдылық қорларының өкілдері бар тәуелсіз қазылар алқасы өтінімдерді қарайды.
Досбол АТАЖАН