Қазақстандық теннисші Зарина Дияс Испанияның Таусте қаласында өткен ITF W35 санатындағы турнирде топ жарып, кезекті рет чемпион атанды, деп хабарлайды Aqshamnews.kz тілшісі.
Финалдық кездесуде Дияс италиялық Дилетта Черубинимен (WTA рейтингі – 446) шеберлік байқасты. Қарсыласын 6:1, 6:7 (4:7), 6:1 есебімен жеңіп шыққан Зарина матчты 2 сағат 1 минутта аяқтады.
Бұл – оның ITF турнирлеріндегі 12-ші чемпиондық титулы. Бұған дейін Зарина WTA 250 деңгейіндегі турнирде де жеңімпаз атанған болатын.
"Бұл жеңіс Заринаның халықаралық ареналарда қайтадан сенімді ойын көрсетіп келе жатқанын дәлелдейді. Оның тәжірибесі мен кәсіби шеберлігі жас спортшыларға үлгі", – делінген Қазақстан теннис федерациясының мәлімдемесінде.