Депутат Ринат Зайытов Ақсуат халқы сыйға берген көлікті қайтармайтынын мәлімдеді. Ол мемлекеттік қызметкер ретінде емес, фестивальге қатысқан ақын ретінде сыйлық алдым деп санайды.
Зайытовтың айтуынша, бұл сыйлық бүкіл бір ауданның атынан ұсынылған және оны қабылдаудан бас тарту дүниетанымына сыймайтын әрекет болар еді. Оның пікірінше, бұл шара өнер адамдарына деген құрмет білдірудің бір түрі.
Дегенмен, «Мемлекеттік мүлік туралы заң» бойынша, мемлекеттік қызметкерлер мемлекеттік қызметтің аясында қандай да бір сыйлықтарды қабылдауға құқығы жоқ.
Заң бойынша, Зайытов осы көлікті алғаннан кейін жеті күн ішінде Қаржы министрлігінің Мемлекеттік мүлік және жекешелендіру комитетінің аумақтық бөліміне өткізуі тиіс.