Италияның Милан қаласындағы «Сан-Сиро» стадионында XXV қысқы Олимпиада ойындарының салтанатты ашылу рәсімі өтеді. Астана уақытымен ашылу салтанаты 23:55-те басталып, Qazaqstan, Qazsport, «Хабар» және Jibek Joly телеарналарынан тікелей эфирде көрсетіледі, - деп хабарлайды Аqshamnews.kz тілшісі.
Ұлттық құрамалар шеруі кезінде Қазақстанның мемлекеттік туын Денис Никиша (шорт-трек) және Аяулым Амренова (фристайл-могул) алып шығады. Айта кетейік, ашылу рәсімі бір мезетте төрт локацияда ұйымдастырылады: Денис Миланда болса, Аяулым Ливиньодағы (шаңғы жарыстары өтетін алаң) шараға қатысады. Салтанатты кештің атауы - Armonia («гармония»).
Биыл Олимпиада алауы алғаш рет екі жерде жағылады: Миландағы Триумф аркасында және Кортина-д’Ампеццодағы Piazza Di-bona алаңында.
Милан–Кортина Олимпиадасында Қазақстан атынан 36 спортшы (18 ер, 18 әйел) 10 дисциплинада бақ сынайды. Жалпы, ойындарға 93 елден шамамен 3000 атлет қатысып, 16 спорт түрі бойынша 116 медаль жиынтығы сарапқа салынады. Олимпиада 22 ақпанда аяқталады. Қазақстан спортшылары қатысатын жарыстардың барлығы аталған 4 арнадан тікелей эфирде көрсетіледі.