Алматы қаласы Білім басқармасына қарасты М. Базарбаев атындағы №138 гимназияда ұлттық стильде безендіріліп, киіз үй үлгісінде жасалған заманауи «Парасат шаңырағы» этно-кабинеті салтанатты түрде ашылды, – деп хабарлайды aqshamnews.kz тілшісі.
Бұл Алматы қаласындағы мектептер арасында жүзеге асырылған алғашқы осындай жоба. Дәстүрлі музей бұрыштарынан айырмашылығы, заманауи білім беру талаптарына сай жабдықталған бұл киіз үй толыққанды оқу кабинеті саналады.
Іс-шараның құрметті қонақтары қатарында: білім саласында «Қазақстанның Еңбек Ері» атағын алғаш алған тұлға (2008 ж.), «Алтын жұлдыз» және «Отан» ордендерінің иегері Аягүл Миразова, «Ұстаз» қалалық кәсіподағының төрағасы Серікжан Байгуттинов, Қазақстанның еңбек сіңірген қайраткері, М. Мақатаев атындағы сыйлықтың лауреаты Гүлшара Есетова және басқа да қонақтар болды.
«Жаңа кабинеттің негізгі міндеттері – оқушыларға ұлттық құндылықтарды сіңіру, қазақ халқының дәстүрлері мен мәдени мұрасымен таныстыру, ұлттық сана-сезімді дамыту, сондай-ақ этнопедагогика негізінде тәрбие мен білімді үйлестіре беру», – деді №138 гимназия директоры Медет Қасымбаев.
Киіз үй ішінде ұлттық сәндік элементтермен қатар (тұрмыстық бұйымдар, қолөнер үлгілері, дәстүрлі музыкалық аспаптар) заманауи оқу құралдары да орналастырылған. Мұнда ашық сабақтар, тәрбие сағаттары және танымдық іс-шаралар өткізу жоспарланып отыр. Салтанатты рәсім барысында қонақтарға кабинет таныстырылып, оқушылар ұлттық мәдениетті насихаттауға бағытталған Наурыз мерекесін ұйымдастырды.