ІnterContinental алаңында Women In Business халықаралық форумы өтті.
Ауқымды шараға кәсіпкер, сарапшы, лидерлер қатарынан 350-ден аса қыз-келіншек жиналды. Әйелдер кәсіпкерлігінде кездесетін өзекті сын-қатер, сондай-ақ жаңа мүмкіндік пен қолдау шаралары талқыланды. Форумға қатысушылар әйелдер кәсіпкерлігін қаржыландыру, бизнес негізіне оқыту мен кедергіні жою мәселесіне назар аударды. Іс-шара барысында спикерлер экономикалық өсу үшін гендерлік теңдіктің маңызына мән берді.
«Әлемдік жалпы ішкі өнімдегі 7 трлн долларға дейінгі шығын әйел мен ер арасындағы еңбекақы алшақтығы салдарынан туындайды. Елімізде ерлерге қарағанда, әйелдер 26 пайызға аз табыс табады. Әйелдер кәсіпкерлігін қолдау – өзекті шешімнің бірі», – деп мәлімдеді Halyk Bank басқарма төрайымы.
Расында, әлем күрделі сын-қатерге тап болды, соның салдары еліміздің экономикасына да әсер етуде. Экономканың сапалы әрі тұрақты өсуі, халықтың әл-ауқатын арттыру – мемлекеттің экономикалық саясаты, жүргізіліп жатқан реформаның нәтижесі.
«Бизнесті дамытуға меншік, мұрагерлік пен әйелдердің қаржылық қызметіне, қарыз-қаражатқа оңайлатылған қол жетімділік мәселесіне заңнамалық кепілдікті қамтамасыз ету қажет. Сондай-ақ, экономиканың түрлі саласында табысты жұмыс істеуде дағды мен білім беруге, әйелдердің білімі мен кәсіби дайындығына инвестиция салу маңызды», – Дүниежүзілік банктің Орталық Азия бойынша өңірлік директоры Татьяна Проскурякова.
Форум аясында салық салу мәселесіне қатысты шеберлік сабағы, жоба аясында онлайн оқудан өткен Belesteri байқауының 17 жеңімпазы марапатталды. Жоба жеңімпаздары ауыл әйелдері мен жастар жеке кәсіп бастауға, оны дамытуға грант иеленді. Жоба шағын кәсіп бастаушыға да, бизнесті ауқымдауға да үш түрлі білім бағдарламасын ұсынды. 12 жыл ішінде 137 мыңнан аса қыз-келіншек оқуға қатысты. 10 мыңға жуық шағын бизнес пен 13 мыңнан аса жұмыс орны құрылды.
«Women in Business – жай ғана форум емес, бизнес пәлсапасы, контент пен нетворктің сапалы деңгейінің трансформациясы. Биыл біз әйел кәсіпкерлер жаңа сын-қатерге қалай қарсы тұрып, макроэкономикалық өзгерістен ақпараттық қауіпсіздікке дейінгі жаһандық мәселені шешуге қалай ықпал ете алатынын талқыладық. Әйелдер бизнесіне жаңа мүмкіндік ашып жатқан цифрлық трансформация мен жаңа технологияларға баса назар аударылды», – деп қорытындылады форум ұйымдастырушысы Ақеркін Ералиева.