Сенат вейптерге толық тыйым салатын заңның жекелеген баптарын жаңа редакцияда ұсынып, Мәжіліске қайтарды.
Енді вейптерді жарнамалауға да шектеу енгізілмек. Заң жобасында электронды темекілерге қылмыстық жауапкершілік қарастырылған, деп хабарлайды Almaty-akshamy.kz.
Мәселен, сатқаны үшін ең жоғары жаза – 50 тәулікке дейін қамауға алу. Ал әкеліп, таратқаны үшін – 2 жылға дейін бас бостандығынан айыру, қылмыстық топ құрып, заңсыз әрекетті бірнеше рет қайталаған жағдайда – 5 жылға дейiн бас бостандығынан айыру көзделген.
Жалпы, сарапшылар электронды темекі өкпені туберкулез дертімен тең дәрежеде зақымдайтынын айтады. Дүниежүзілік Денсаулық сақтау Ұйымының мәліметінше, 33 мемлекетте электронды темекі сатуға тыйым салынған. Сонымен қатар жиында депутаттар жөспірімдер мен балаларға энергетикалық сусын түрлерін сатпауды ұсынды. Денсаулық сақтау министрлігінің өкілі, бұл мәселе әлі де қаралып жатқанын айтты.
«Вейптердің саудасы бойынша қылмыстық жауапкершілік енгізіледі. Кінәлілер ескертумен құтылмайды. Заң күшіне енгеннен кейін, сату да, тұтыну да қылмыс болады. Жарнамалауға да тыйым салынады», - дейді ҚР Парламенті Сенатының төрағасы Мәулен Әшімбаев.