Вирус жұқтырған адамдардың ауыз қуысы мен мұрынында вирус көп болады
Вакцина алған адамдарда сырқат анағұрлым жеңіл өтеді. Бұл туралы дат ғалымдары – профессор, Видорв қаласының жұқпалы аурулар аурханасының бас дәрігері Томас Бенфилд пен Орхус университетінің иммунолог профессоры Руне Хартманн мәлімдеді, деп хабарлайды Almaty-akshamy.kz.
Ғалымдар Danmarks Radio-на берген сұхбатында вакцина алған адамдарда сырқат қалай жүретінін айтты. Олар вакцина алған адамдар да вирустың жаңа нұсқасын жұқтырып алатынын жеткізді.
Олардың айтуынаша, коронавирусқа қарсы вакцина алған адамдар вирус жұқтырған кезде оларда бас ауруы, түшкіру, тамағының ауруы мен мұрыннан су ағу сияқты белгілері болады. Кейбірінде дене ыстығы көтеріліп, иіс сезу жоғалып кетеді екен.
Хартманн түсіндіруінше, вакцина алған даамдар арасында да сырқат ауыр жүретін көрінеді, тіптен өлім жағдайына дейін әкеледі екен.
«Қазір сырқаттың ауыр түрінің күрт төмендегенін көріп отырмыз. Бұл дегеніміз адамдар аурухаға бұрынғыдай көп түспейтінін білдіреді,-дейді ол.
Сонымен қатар ол сырқаттың өту мерзімі нақты вакцинаның құрамы мен адам ағзасына, оның жасына байланысты болатынын жеткізді. Мамандар 70 жастан асқан адамдар вакцина алған соң алты ай өткенде оның күші әлсірейтінін байқаған. Сол үшін тағы вакцина салдырған дұрыс дейді.
Сондай-ақ вакцина алған адамдар COVID-19-ды жұқтырған кезде оны өзге адамдарға тарата береді, оның алдын алу үшін ПТР тест тапсырып отыру қажет, деп түсіундірді Бенфилд. Оның айтуынша, вирус жұқтырған адамдардың ауыз қуысы мен мұрынында вирус көп болады, сондықтан олар көп адамға жұқтыруы мүмкін.
Бұған дейін Германия мен Бельгияның медицина қызметкерлері коронавирус адамның ми жасушаларына қауіп төндірмейді деген тоқтамға келген еді. Олар коронавирус негізінен тұрақты жасушалар нысанын зақымдайтынын айтқан. Ғалымдар COVID-19 иіс сезіміне жауап беретін сенсорлық нейрондарды зақымдайтынын дәлелдей алмады.