Елімізде ұстаздардың кәсіби шеберлігін тану және қолдау мақсатында дәстүрлі «Үздік педагог» республикалық байқауы басталды. Жеңімпаздарға 1000 айлық есептік көрсеткіш көлемінде (шамамен 3,9 миллион теңге) мемлекеттік сыйақы беріледі, деп хабарлайды aqshamnews.kz
Байқауда мұғалімнің білім беру саласына қосқан үлесі, қызметінің тиімділігі және кәсіби біліктілігі бағаланады. Мектепке дейінгі, орта, техникалық және кәсіптік білім беру ұйымдарының педагогтері қатыса алады.
Байқау үш кезеңнен тұрады:
-
1-кезең – аудандық/қалалық деңгей (8–25 шілде);
-
2-кезең – облыстық деңгей (28 шілде – 15 тамыз);
-
3-кезең – республикалық деңгей (18 тамыз – 18 қыркүйек).
Алғашқы екі кезеңде ең жоғары ұпай жинаған педагогтер финалға – республикалық кезеңге өтеді. Байқауға қатысуға өтінім қабылдау, құжаттарды тапсыру және бағалау uzdikustaz-nobd.edu.kz веб-порталында жүзеге асырылады.
«Үздік педагог» байқауы 2012 жылдан бері өткізіліп келеді. Осы уақытқа дейін 700-ге жуық педагог үздік деп танылды. Байқауға қатысу үшін үміткердің кемінде 5 жыл үздіксіз педагогикалық өтілі болуы шарт.
Қосымша ақпаратты ҚР Оқу-ағарту министрлігінің ресми сайтынан алуға болады.