2025 жыл – Жұмысшы мамандықтарының жылы болып жарияланды. Бұл шешім – еліміздің дамуына негіз болатын, қол еңбегімен ел игілігіне үлес қосып жүрген мамандардың мәртебесін көтеруге бағытталған. Себебі білім – ел болашағының іргетасы. Осы жолда аянбай еңбек етіп, дарынын, шығармашылығын және білімін ұштап жүрген жастар – қоғам мақтанышы.
Жыл сайын еліміздің әр өңірінде өткізілетін «Үздік 100 студент» жобасы – осындай белсенді, ізденімпаз жастарды анықтауға, олардың еңбегін бағалауға арналған игі бастама. Биыл Қазақстан Республикасы Оқу-ағарту министрлігінің тапсырмасы бойынша Астана қаласында республикалық деңгейде аталмыш жобаның байқауы ұйымдастырылды.
Бұл конкурс тек үздік оқитындарды ғана емес, сонымен қатар ғылыми-зерттеу жұмыстарымен айналысатын, қоғамдық шараларға белсене қатысатын, спорт пен өнерде жетістіктерге жеткен жастарды да қамтиды. «Үздік 100 студент» атағы – қажырлы еңбек пен табандылықтың жемісі.
Жобаның басты мақсаты – жұмысшы мамандықтардың, оның ішінде аспаздық, шаштараз өнері, тігін ісі сынды кәсіптердің беделін арттыру, сондай-ақ студенттердің кәсіби дамуына қолдау көрсету. Биылғы тізімге енген студенттер – өз саласында айрықша нәтиже көрсеткен жас мамандар.
Олардың қатарында Алматы сән және қызмет көрсету саласы колледж директорының тәрбие ісі жөніндегі орынбасары Омарова Күнімай Нұрлыбайқызының жетекшілігі мен 3- бағам студенті Оразбаев Айбек Бағланұлы да бар. Ол бұл конкурсқа үлкен дайындықпен келіп, ерекше жобасымен көзге түсті. Айбек өз жобасында туған өңірі жайлы, іске асырылып жатқан бастамалар туралы, сондай-ақ өзі білім алып жатқан оқу орны мен таңдаған мамандығы туралы кеңінен баяндады. Байқауға қатысудағы мақсаты мен жетістікке жету жолын шынайы түрде көрсете білді.
Сонымен қатар, бұл байқау оған үлкен тәжірибе мен тың ақпараттар алып, кәсіби өсу жолында сенімді қадам жасауға мүмкіндік бергенін атап өтті. Әрине, мұндай табыстар – студенттің жеке еңбегінің, ұстаздарының қолдауы мен ата-анасының сенімінің нәтижесі. «Үздік 100 студент» жобасы – жастардың білімге деген ынтасын арттырып, жауапкершілік пен сенімділікті қалыптастырады. Мұндай байқаулар салауатты бәсекелестік орнатуға, жас ұрпақтың өз әлеуетін толық ашуға жол ашады.
Қорытындылай келе, бұл жоба – еліміздің болашағын жасақтайтын көшбасшы жастарды тәрбиелеудің, олардың әлеуетін қолдаудың жарқын үлгісі. Осындай бастамалар Қазақстанның интеллектуалдық әлеуетін көтеріп, жастардың қоғамдағы рөлін нығайта түседі. Әр мамандық – табысты болашақтың бастауы екенін ұмытпайық.
Алматы сән және қызмет көрсету саласы колледжі
Кітапхана меңгерушісі Жандар Сәуле Илиясқызы