Бір апта ішінде 2,6 мыңнан астам мұғалім мен тәрбиеші ниет білдірген.
«Үздік педагог-2022» конкурсына қатысуға құжат қабылдау жалғасып жатыр. Алғашқы аптада еліміздің әр өңірінен 2,6 мыңнан астам мұғалім мен тәрбиеші өз өтінімдерін жолдап үлгерді, деп хабарлайды Almaty-akshamy.kz.
Құжат қабылдау 12 қыркүйекте басталып, 2022 жылғы 22 қыркүйекке дейін жалғасады. Байқауға мектепке дейінгі, орта, техникалық және кәсіптік білім беру ұйымдарының педагогтері қатыса алады. Жеңімпаздар 3 млн теңге көлемінде сыйақы алады. Былтыр еліміздің әр өңірінен 64 мұғалімнің әрқайсысы 3 млн теңгеден алған болатын.
«Биыл байқауды цифрландырудың арқасында біз конкурстың үш кезеңіне де қанша мұғалім қатысатынын бақылай аламыз. Бірінші аптада https://teachercontest.iac.kz/ веб-порталында 2 630 мұғалім мен тәрбиеші тіркелді. Биыл байқауға қатысатын әрбір мұғалім сауалнаманы толтырғаннан кейін байқаудың одан арғы динамикасын, яғни қатысушылардың қай кезеңде екенін, оларға сарапшылар қандай ұпай бергенін бақылай алады», - деді ҚР Оқу-ағарту министрлігі Мектепке дейінгі және орта білім комитетінің төрағасы Гүлмира Кәрімова.
«Үздік педагог» атағының иегерлеріне 3 млн теңге көлеміндегі ақшалай сыйақы ғана емес, төсбелгілер де беріледі.
Байқау ережелері туралы қосымша ақпаратты Оқу-ағарту министрлігінің сайтынан да табуға болады.