Акция аясында «Мағыналы мұрт» челленджі өткізіледі, деп хабарлайды aqshamnews.kz тілшісі.
Қазақ онкология және радиология ғылыми-зерттеу институты ерлер денсаулығына, аурулардың алдын алуға және медициналық көмекке уақтылы жүгінуге назар аударуға бағытталған «Мұртты қараша» акциясына қосылуға шақырады.
Бастама Қазақстанда 1–30 қараша аралығында өтетін өкпе обыры мен қуықасты безі обыры туралы хабардарлықты арттыру айлығы аясында ұйымдастырылады. Институттың ресми ақпараттық ресурстарында аталған аурулардың қауіп факторлары, диагностикасы және емдеудің заманауи мүмкіндіктері туралы материалдар жарияланады.
Акцияның нышаны – мұрт. Қараша айында мұрт өсіру арқылы қатысушылар ақпараттық науқанға қолдау білдіріп, өз денсаулығына жауапкершілікпен қараудың маңызын еске салады.
Акция аясында «Мағыналы мұрт» челленджі өткізіледі. Оған қатысу үшін:
1. Қараша бойы мұрт өсіру немесе бар мұртыңызбен акцияға қосылу.
2. Ерлер денсаулығына қамқорлық жасаудың маңызы туралы фотосурет немесе бейнеролик жариялау.
3. ҚазОжРҒЗИ-дың ресми парақшасын белгілеп, #Мұрттықараша, #ҚазОжРҒЗИМұрттыҚараша және #МұртпенҚолдау.
4. Эстафетаны үш досыңызға немесе әріптесіңізге жолдау қажет.
Акцияға қараша айының кез келген күнінде қосылуға болады. Мұрт өсіруді жоспарламайтын қатысушылар бастаманы жазба немесе бейнеүндеу арқылы қолдай алады. Тіркелу және ақшалай жарна төлеу талап етілмейді.
ҚазОжРҒЗИ блогерлерді, спортшыларды, журналистерді, барбершоп мамандарын және басқа да серіктестерді дәрігерлермен бірлескен бейнематериалдар әзірлеуге және сенімді ақпарат таратуға шақырады.
Ынтымақтастық жөніндегі ұсыныстар @kazoncoinstitute институттың ресми парақшасына хабарлама арқылы қабылданады. Парақшада жариялауға ұсынылатын материалдарды #МұртӨсір белгісімен жолдау қажет.
Акцияның басты міндеті – ер азаматтарды өз денсаулығына көңіл бөлуге, туындаған сұрақтарды дәрігермен талқылауға және медициналық көмекке жүгінуді кейінге қалдырмауға ынталандыру.