Жетісу ауданына қарасты Кемел ықшамауданының Мәдениет үйінде өткен мерекелік шараға жас отбасылар, аға буын өкілдері, қоғам қайраткерлері және өнерпаздар қатысты.
Іс-шара әкімдік пен әлеуметтік мекеме өкілдерінің құттықтау сөздерінен басталды.
Алматы қаласы Жетісу ауданы әкімдігі қоғамдық даму бөлімінің басшысы Рүстем Исмайылов тұрғындарды Отбасы күнімен және алдағы қала күнімен шын жүректен құттықтады. Сонымен қатар, ол Алматы қаласы әкімінің орынбасары Азамат Қалдыбековтың атынан «Мерейлі отбасы» қалалық байқауының жеңімпаздарына алғыс хаттар мен естелік сыйлықтар табыстады.
Алматы қаласының Жетісу ауданында тұратын Қанаевтар отбасы биыл алтын тойын – 50 жылдық некесін атап өтуде. Дәл осы жұп «Мерейлі отбасы» қалалық байқауында екінші орынға ие болды. Байқаудың мақсаты – отбасылық құндылықтарды насихаттау және қазақстандық отбасының оң бейнесін қалыптастыру. Ұстаз бен құрылысшының махаббатқа толы әдемі тарихы мықты әрі бақытты одаққа ұласты. Орынша мен Нұрғали Қанаевтар төрт қыз тәрбиелеп, тоғыз немере сүйіп отыр.
– Татулығы жарасқан отбасының құпиясы қарапайым: бір-бірін тыңдау, өзара түсіністік пен құрмет көрсету және қателіктер үшін дер кезінде кешірім сұрау маңызды, – деп бөлісті жұп.
Отбасы күні мерекесі аясында көпбалалы аналар да аудан әкімдігінен мақтау қағаздарына ие болды.
Мерекелік концерттік бағдарлама көрермендердің көңілінен шықты. Сахнада ана туралы, махаббат жайлы әндер шырқалып, «Көңіл ашар» күйі орындалды. Белсенді ұзақ өмір сүру орталығының қызмет алушылары ұлттық билерді орындап, көрермендерді қуанышқа бөледі.