Алматы қаласы Алатау ауданындағы Ұлттық ұланның 7552 әскери бөлімі қамқорлығына алған №210 мектеп-лицейінде Кеңес әскерлерінің Ауғанстан жерінен шығарылғанына 37 жыл толуына орай «Ер есімі – ел есінде!» атты ерлік сабағы ұйымдастырылды.
Іс-шараның мақсаты – Отан алдындағы борышын абыроймен атқарған ардагерлердің ерлігін өскелең ұрпаққа үлгі ете отырып, жастарды отансүйгіштікке және батырлық рухқа тәрбиелеу.
Ерлік сабағына Ауған соғысының ардагері Әділхан Абибеков және тәжік-ауған шекарасында жауынгерлік қызмет атқарған ардагер Ералы Қордабаев арнайы қатысып, оқушылармен сыр-сұхбат форматында кездесу өткізді. Ардагерлер әскери қызмет жылдарындағы естеліктерімен бөлісіп, бейбіт өмірдің қадірін бағалау, елге адал қызмет ету және нағыз патриот болудың маңызы туралы ой-пікірлерін жеткізді. Сонымен қатар, жастарға ел болашағы өз қолдарында екенін айтып, олардың білімді, жауапты әрі отансүйгіш азамат болып қалыптасатынына сенім білдірді.
– Біз соғыстың не екенін көрдік, сондықтан бейбіт өмірдің бағасын жақсы білеміз. Отанды сүю — тек сөз емес, ол жауапкершілік, тәртіп және елге адал қызмет ету. Бүгінгі жас ұрпақ білімді, рухы мықты, еліне пайдалы азамат болып өссе, біздің көрген қиындықтарымыздың ақталғаны, – деді Ауған соғысының ардагері Әділхан Абибеков.
Іс-шара барысында Ауған соғысының тарихына қысқаша шолу жасалып, оқушылар патриоттық өлеңдер оқып, өнерлерін көрсетті.
Кездесу барысында оқушылар ардагерлерге сұрақтар қойып, мазмұнды жауаптар алды. Мұндай тағылымды кездесулер жас ұрпақтың тарихи санасын қалыптастырып, ерлік пен елдік құндылықтарды дәріптеуге зор ықпал ететіні атап өтілді.
Кездесу соңында мектеп-лицей директорының атынан алғашқы әскери дайындық пәнінің мұғалімі запастағы полковник Ниязтай Алкешев ардагерлерге алғыс білдіріп, олардың Отан алдындағы жауынгерлік борышты жоғары жауапкершілікпен атқарғаны, соғыс жылдарында көрсеткен ерлігі, қайсарлығы мен отансүйгіштік қасиеттері бүгінгі ұрпақ үшін әрдайым үлгі әрі өнеге екенін атап өтті. Ардагерлерге арнайы Алғыс хаттар табысталды.
Тағылымға толы ерлік сабағы жас буынның бойында патриоттық рухты нығайтып, ел қорғаған аға буынға деген құрмет сезімін арттыра түсті.