Ұлттық құрылтай отырысында Мемлекет басшысы Қасым-Жомарт Тоқаев Конституцияға қатысты кәсіби заңгерлер тарапынан айтылған ұсыныстарға тоқталды, - деп хабарлайды Aqshamnews.kz
Президенттің айтуынша, Ата заңның кейбір нормаларын нақтылай түсу қажеттігі туындап отыр.
Мемлекет басшысы, әсіресе, Президент өкілеттігін беру және сайлау өткізу мәселесіне назар аударды. Қазіргі Конституцияға сәйкес, Президент өз міндетін атқара алмайтындай жағдай туындаса, оның өкілеттігі қалған мерзімге Сенат төрағасына берілетіні белгілі. Ал Сенат төрағасы да мемлекетті басқаруға мүмкіндігі болмаса, Президент өкілеттігі заңда белгіленген тәртіппен өзге лауазымды тұлғаларға өтеді.
Президент бұл жерде негізгі мәселе «қалған мерзім» ұғымына тірелетінін атап өтті. Себебі бұл мерзім алты айға да, тіпті алты жылға дейін созылуы мүмкін. Осыған байланысты Мемлекет басшысы Конституцияда Президент мерзімінен бұрын қызметінен кеткен жағдайда екі айдың ішінде кезектен тыс сайлау өткізу туралы норма нақты белгіленуі қажет екенін айтты.
Қасым-Жомарт Тоқаевтың сөзінше, бұл қадам халықаралық озық тәжірибеге толық сай келеді. Президент кез келген жағдайда билікке тек сайлау арқылы, яғни заңды жолмен келуі тиіс.
– Еліміздің кез келген басшысы билікке сайлау арқылы келуі керек. Бұл – мен үшін мызғымас ұстаным. Бұл норма кейінгі мемлекет басшылары үшін де өзгермейтін қағида болуы тиіс, – деді Мемлекет басшысы.
Президенттің бұл бастамасы Конституциялық нормаларды нақтылап, елдегі билік транзитінің ашық әрі заңды түрде жүзеге асуына негіз болмақ.
