Наурызнама онкүндігі аясында 18 наурыз – Ұлттық киім күніне орай Алматы қаласында тағылымы мол мәдени іс-шара өтті. Атаулы күннің мән-маңызын арттыру, ұлттық құндылықтарды насихаттау және жастардың бойында ұлттық рухты қалыптастыру мақсатында ұйымдастырылған «Ұлттық киім – ұлт мақтанышы» атты сән көрсетілімі көпшілікке ерекше әсер сыйлады.
Іс-шараны Алматы қаласының Орталықтандырылған кітапханалар жүйесіне қарасты №20 кітапхана ұжымы мен Алматы қаласы Білім басқармасына қарасты Алматы сән және қызмет көрсету саласы колледжі бірлесіп ұйымдастырды.
Шараның ашылу салтанатында сөз алған колледж директорының тәрбие ісі жөніндегі орынбасары Омарова Күнімай Нұрлыбайқызы жиналған қауымды Ұлттық киім күнімен құттықтап, ұлттық киімнің ұлт болмысындағы ерекше орнын атап өтті. Ол өз сөзінде ұлттық құндылықтарды сақтау мен оны жас ұрпақтың бойына сіңіру – бүгінгі күннің басты міндеттерінің бірі екенін жеткізіп, осындай тағылымды іс-шаралардың маңыздылығына тоқталды.
Ұлттық киім күні – халқымыздың бай мәдени мұрасын, салт-дәстүрін, ұлттық болмысын айшықтайтын ерекше мереке. Бұл күні ата-бабамыздан мирас болып қалған ұлттық киімдердің көркемдігі, олардың әрбір ою-өрнегінің терең мағынасы мен тәрбиелік мәні кеңінен насихатталады.
Шара барысында колледж студенттері қазақ халқының дәстүрлі киім үлгілерін заманауи сәнмен үйлестіре отырып, көрермендер назарына ұсынды. Әсіресе, жас ерекшеліктеріне сай дайындалған киім топтамалары ұлттық нақыш пен қазіргі стильдің үйлесімін айқын көрсетті. Сән көрсетілімі көрермендерге эстетикалық әсер сыйлап қана қоймай, ұлттық киімге деген қызығушылықты арттыра түсті.
Іс-шараға арнайы шақырылған қонақтар – «Сенімен Болашақ» республикалық қоғамдық бірлестігінің Алматы филиалы мен «Қазақ аналары – дәстүрге жол» республикалық қоғамдық бірлестігінің өкілдері де ұлттық құндылықтардың маңыздылығына тоқталып, жастарға өздерінің ақжарма тілектерін білдірді. Әжелеріміз ұлттық тәрбие мен салт-дәстүрдің сабақтастығы жайлы тағылымды ойларымен бөлісті.
Аталған шара ұлттық мәдениетті сақтау мен дәріптеуде маңызды рөл атқарып, жас ұрпақтың ұлттық құндылықтарға деген құрметін арттыруға өз үлесін қосты. Сонымен қатар, ұлттық киімді заманауи сәнмен ұштастыру арқылы оның өміршеңдігін дәлелдей түсті.
Ұлттық киім – халқымыздың рухани болмысы мен мәдени кодының ажырамас бөлігі. Сондықтан мұндай іс-шаралар ұлттық мұраны жаңғыртып қана қоймай, ел бірлігін нығайтып, ұлт мақтанышына айналары сөзсіз.
Алматы сән және қызмет көрсету саласы колледжінің
кітапхана меңгерушісі Жандар Сәуле Илиясқызы