Жаздың келуімен бірге алматылықтар ашық ауада серуендеп, демалып, күнге қыздырынуға асығады. Алайда дәрігерлер ескертеді: ультракүлгін сәулелер теріге зиян келтіріп, қатерлі ісікке әкелуі мүмкін.
Қауіп қандай?
Дүниежүзілік денсаулық сақтау ұйымының деректеріне сәйкес, жыл сайын әлемде терінің меланома емес қатерлі ісігінің 3 миллионнан астам және меланоманың 130 мыңнан астам жаңа жағдайы тіркеледі. Меланома – ең қауіпті әрі жылдам таралатын ісіктердің бірі.
Алматы Онкологиялық орталығының онкологы Назира Бижанованың айтуынша, ультракүлгін сәулелер тері жасушаларын зақымдап, мутацияға және қатерлі ісіктің дамуына себеп болады. Ашық терілі адамдар, меңдері көп жандар, күн астында немесе солярийде көп болатындар тәуекел тобында.
Қалай қорғануға болады?
Дәрігерлер күннен қорғанудың қарапайым, бірақ тиімді жолдарын ұсынады:
-
SPF 30 немесе одан жоғары қорғаныс деңгейі бар күннен қорғайтын крем қолдану;
-
Басыңызды жабатын қалпақ, көзілдірік, иық пен қолды жабатын киім кию;
-
Сағат 11:00–16:00 аралығында күн астында болудан аулақ болу;
-
Бұлтты күндері де қорғануды ұмытпау.
Егер теріңізде меңнің пішіні немесе түсі өзгерсе, жаңа дақтар, қышу, қабыршақтану немесе қан кету байқалса – міндетті түрде дерматологқа не онкологқа көрініңіз.
Тері қатерлі ісігі ерте кезеңде анықталса, тиімді емделеді. Сондықтан дер кезінде тексеріліп, қорғану шараларын ұстану – денсаулығыңызды сақтаудың басты жолы.
Жаз – қуаныш пен демалыс мезгілі. Шуақты күндерді денсаулыққа зиянсыз, ақылмен өткізіңіз. Өзіңізге және жақындарыңызға қамқор болыңыз!