Қазақстан Үкіметі Аппаратының қызметкерлері Мемлекет басшысының бастамасымен «Таза Қазақстан» жалпыұлттық экологиялық акциясы және Дүниежүзілік тазалық күні (World Cleanup Day) аясында өткізілген Астана қаласындағы жалпықалалық сенбілікке белсенді түрде қатысты, деп хабарлайды aqshamnews.kz
Президент «Әділетті Қазақстан: заң мен тәртіп, экономикалық өсім, қоғамдық оптимизм» атты халыққа Жолдауында азаматтарды біріктірген жасампаз бастаманың маңыздылығын ерекше атап өтіп, «Таза Қазақстан» жалпыұлттық акциясының жыл бойы жалғасуын қамтамасыз етуді тапсырған болатын.
Сенбілік барысында Үкімет Аппаратының қызметкерлері EXPO аумағында 100 қылқан жапырақты ағаштың көшеттерін отырғызды.
«Таза Қазақстан» акциясы аясында, наурыз айынан бері 4 млн-нан астам тұрғынның қатысуымен елімізде 140-тан астам экологиялық іс-шара ұйымдастырылды. Осы акция барысында 21 мыңнан астам әлеуметтік нысанның аумағы тазартылып, 5 мыңға жуық саябақ пен сквер абаттандырылды. 2,9 мың ағаш және бұта көшеттері отырғызылды. Сонымен қатар, 800-ден астам субұрқақ жөнделіп, 1,1 млн тоннадан астам қоқыс жиналды.