Қазақстандағы ықпалды Amanat партиясының депутаттары жақында әлеуметтік желілерде бейнеролик жариялады. Онда олар мемлекет бойынша бірыңғай уақыт белдеуін енгізуді қайта қарауға шақырды. Бірнеше өңірге бұл өзгерістер келеңсіздік әкелгенін айтты. Келесі Үкімет сағатында бұл сұрақты талқылауға шығаруға дайын екендіктерін білдірді. Taspanews.kz корреспонденті Ринат Зайытовпен хабарласып, шешім олардың қатысуынсыз қабылданғанын және мәжіліс депутаттарына пікір білдіруге мүмкіндік берілмегенін білді.
«Ыңғайсыз уақыт»
Уақыт белдеуін қайта қарауға бастама көтергендер қатарында Ринат Зайытовпен бірге Нұртай Сабилянов, Ұлықбек Тұмашинов, Мақсат Толықпаев, Самат Нұртаза және Гүлдара Нұрымова бар. Олар өз деректерінде бірыңғай уақыт белдеуі тек Қостанай, Қызылорда, Батыс Қазақстан облысы тұрғындары үшін ғана қолайлы екенін айтты. Алайда, қарама-қайшылықтар да барын жеткізді. Мәселен, Солтүстік Қазақстан, Оңтүстік Қазақстан, Павлодар, Абай облыстары және Жетісу өңірлерінде айтарлықтай келеңсіздіктер туған. Бұл өңірлерде таңғы сағат үш жарымда күн шығып, кешкі сағат бестерде батып кетеді.
«Екінші, үшінші ауысымда оқитын оқушылар не істемек?» — деп депутаттар халықтың сөзін сөйледі.
Осылайша, Үкімет бұл жаңа ұсынысты қарауға уәде берді. Вице-премьер Тамара Дүйсенова шешім қабылданғаннан бері бір жыл өтпесе де, депутаттар келтіретін дәлелдер қарастырылатынын айтты.
Мәжілісте талқыланбаған сұрақ
Ринат Зайытов Taspanews.kz тілшісіне уақыт белдеуін ауыстыру Қазақстанның кей облыстарында ыңғайсыздық туғызғанын айтты.
«Сол облыстарда тұрып жатқан халықтың күнделікті тіршілігінің ырғағы бұзылып отыр. Өзгертпесе болмайды оны. Бірақ, әдеттегі «естуші үкіметіміз» тағы ойлану керек деп жатыр. Бұл кеше ғана көтерілген мәселе емес. Шешімін таппаған соң, бір топ депутат — бірі Абай облысының, бірі Шығыс Қазақстан облысының өкілдерімен бірігіп, бастама көтердік», — деді ол.
Ол бұл мәселеде соңғы сөз Үкімет тарапынан екенін айтты.
«Бұл солардың қаулысы ғой. Оны Парламент қабылдаған жоқ қой, уақытты ауыстыруды», — деді мәжіліс депутаты.
Ол сөзінде мәселені талқылауға «ертең болса да дайын» екенін айтты.
«Тек Үкіметтің жауабын күтіп отырмыз, талқылау қашан болатыны туралы. Қазір арнайы фракция бар, бізде келіссөз жүргізетін, мәжілістің аппараты бар. Солар уақытын белгілейді. Ары кетсе, осы айдың ішінде талқылау болуы керек», — деді Ринат Зайытов.
Ол талқылауға әріптестерімен бірге тиянақты дайындалғанын айтты. Экологтан бастап, уақыт мәселесі бойынша мамандар мен дәрігерлерден дәлелдер жинағандарын, олардың уәждерін келтіру ғана қалғанын жеткізді.
«Үкіметтің өзінің уәжі бар. Бірақ онда ешқандай негіздеме жоқ. Экономикамыз өседі деген, қайда?» — деді ол.
Ол енгізілген өзгерістер бұрынырақта Мәжілісте талқыланбағандықтан, өз келіспеушілігін білдіре алмағанын түсіндірді.