Алматы қаласының Қылмыстық атқару жүйесі департаментіне қарасты №11 мекемесінде, яғни балалар колониясында істі болған 65 жасөспірім жазасын өтеп жатыр. Олардың тәртібі, тәрбиесімен қатар, денсаулығы да жіті бақылауда, – деп хабарлайды aqshamnews.kz тілшісі.
Сондықтан колония ішінде Дильнара Рашидинқызының жетекшілігіндегі медициналық бөлім де жүйелі жұмыс істеп тұр. Онда 15 дәрігер еңбек етеді. Олар жазасын өтеп жатқан сотталған жасөспірмдерге тұрақаты медициналық көмек көрсетіп, жылына екі рет жоспарлы түрде профилактикалық тексеруден өткізіп отырады. Колонияның медбөлімі Алматы қаласының №24 емханасымен әрдайым тығыз байланыста. Түзеу мекемесінде отырған жастарды профилактикалық тексеруден өткізуге осы емхананың дәрігерлері қолдау көрсетеді.
«Жуырда бізге №24 емхананың лор, хирург, окулист, эндрокринолог, психиатр, дермотолог, фтизиатр, ВОП, стаматолог мамандары шақыртылды. Жасөспірімдердің денсаулығын қарап шықтық. Бәрі жақсы. Егер арасында созылмалы ауруы бар балалар анықталса, олар өзіміздің медициналық бөлімнің бақылауына алынады, дәрі-дәрмек беріледі. Қажет болған жағдайда қаладағы ауруханалардан арнайы маман-дәрігерлер шақырылып, қосымша тескеру жұмысы жүргізіліп, қорытынды диагноз қойылып, қажетті ем-дом тағайындалады», – дейді №11 мекемесі медициналық бөлімінің жетекшісі Дильнара Рашидинқызы.
Айта кетсек, жасөспірімдер колониясы жуырда жаңа ғимаратқа көшірілген болатын. Сәйкесінше дәрігерлік бөлімі де жаңарып, заманауи медициналық аппараттармен жабдықталды. Мұнда рентген, стоматология кабинеті, УЗИ-жабдығы және құрт ауруына арналған оқшаулау орны бар. Түзеу мекемесіндегі әр маман балалардың жай-күйін, денсаулығын күндіз-түні бақылауда ұстайды.
Нұржамал ӘЛІШ