Түркістан облысында өз баласы ұрып өлтірген ақсақалдың денесі қара жер қойнынан қайта қазып алынды, - деп хабарлайды Аqshamnews.kz тілшісі "КТК" телеарнасына сілтеме жасап.
Эксгумация жасалған мәйітке мамандар сот-медициналық сараптама жүргізіп, марқұмның нақты неден көз жұмғанын анықтамақшы.
Бұл оқиға Шардара ауданындағы Қоссейіт ауылында болған еді. Жүрегі және омыртқасы ауыратын ақсақалды өз баласы балағаттап, соққының астына алған. Бұл жағдайды көршісі жасырын телефонға түсіріп, әлеуметтік желіге жариялаған болатын. Қауқарсыз қарияға келіні де қол көтеріп, ауыр сөздер айтқаны анықталды.
Кейін келінінен, баласынан оңбай таяқ жеген әке көз жұмды. Осыдан кейін Шардараның айтулы асабасы әрі мешітте азаншы болған озбыр қамауға алынды. Оның әйеліне де полицейлер «ұрып-соғу» бабымен іс қозғаған. Енді сот-медициналық сараптама марқұмның ұлы мен келінінің қолынан өлгенін растаса, күдіктілердің жазасы ауырлауы мүмкін.