Алматы қаласының әкімі Ерболат Досаев Түркісіб ауданының тұрғындарымен кездесуде мегаполистегі инженерлік инфрақұрылымды жаңарту бойынша атқарылып жатқан жұмыстармен бөлісті. Әкімнің айтуынша, қала тұрғындарын үздіксіз жылу және жарықпен қамту – басым бағыттардың бірі, деп хабарлайды Aqshamnews.kz
Қазіргі таңда 2,1 шақырым жылу желісі жаңартылып, «Вокзал» қазандығына жаңа коммуникациялар тартылған. 2025 жылы тағы 8,1 шақырым жылу желісі мен 9 қазандықты қайта жаңарту көзделіп отыр.
Бұл шаралар қаланың жылу жүйесін заманауи талаптарға сай етуге және тұрғын үйлерді тұрақты жылумен қамтамасыз етуге бағытталған.
Сонымен қатар, 55,5 шақырым электр желісі жаңартылып, 22 қосалқы станция іске қосылған. Бұл көрсеткіш қаланың электрмен қамту сапасын арттырып, жаңа тұрғын үй кешендері мен шағын аудандарды толық қамтуға мүмкіндік береді.
Әлмерек және Нұршашқан шағын аудандарында тағы 54,5 км электр желісін жаңарту жұмыстары жүргізілуде. Жоспар бойынша, мамыр айында «Тұздыбастау» қосалқы станциясы пайдалануға берілмек.