Түркияда 22 қаңтар Ұлттық Аза тұту күні болып жарияланды.
21 қаңтар, сейсенбіге қараған түні Түркияның Болу провинциясындағы Карталкая тау шаңғысы курортындағы қонақүйден өрт шықты, деп хабарлайды aqshamnews.kz.
Өрт 12 қабатты (басқа деректер бойынша 11 қабатты) Гранд Картал қонақүйінде жергілікті уақыт бойынша 03:27-де басталған. Қазір Түркиядағы жалпыұлттық екі апталық мектеп демалысы басталды және шаңғы маусымының қызуына байланысты қонақүйде 234 адам болған.
Болу губернаторы Абдулазиз Айдын алдын ала мәлімет бойынша, өрттің қонақүйдің төртінші қабатындағы мейрамхана аймағында басталып, жоғарғы қабаттарға тарағанын айтты. Қонақүй Болудың орталығынан біршама қашықтықта орналасқан. Өрт сөндірушілерге оқиға орнына жету үшін бір сағаттан астам уақыт қажет болды.
Құтқару жұмыстары таңертеңге дейін жалғасты, құтқарушылардың қонақүйдің кейбір бөліктеріне әзер жеткені хабарланды. - Қаза тапқандар саны 76-ға жетті, - деп хабарлады ішкі істер министрі Али Ерликая.
Зардап шеккендердің кейбірінің жағдайы ауыр. Қайғылы жағдайға байланысты бүгін Түркияда Ұлттық аза тұту күні болып жарияланды.
Режеп Тайип Ердоған, Түркия президенті:
- Өрт туралы хабар жеткен бойда өңірге министрлер мен командаларымызды жібердік. Өртті сөндіруге 156 техника мен жеке құрамның 428 адамы жұмылдырылды. Өрттің шығу себебі мен кінәлілерді анықтау үшін тергеу амалдары басталды. 4 адам ұсталды. Мұндай қайғылы оқиғаға себепкер болғандар заң алдында жауап береді. 22 қаңтар ұлттық аза тұту күні деп жарияланды. Еліміз бен шетелдегі өкілдіктерімізде туымыз төмен түсіріледі.