Алматыда UN Tourism (БҰҰ Туризм) ұйымының туристік индустрияда әйелдердің құқығы мен мүмкіндігін кеңейту мәселесіне арналған алғашқы өңірлік конференциясы өтіп жатыр. Іс-шараны ұйым Almaty Tourism Bureau-мен бірлесіп ұйымдастырды. Конференция Еуропа мен Орталық Азия елдерінің үкімет өкілдерін, халықаралық ұйымдарды, бизнес пен үкіметтік емес секторды біріктірді.
Қазақстан туризм саласындағы гендерлік теңсіздікпен күресуге бағытталған UN Tourism-нің Centre Stage атты флагмандық бастамасына белсенді қатысып отыр. Бастаманың негізгі мақсаты – әйелдердің жетекшілік лауазымдарға, кәсіпкерлікке, технологияға және білімге қолжетімділігін кеңейту.
Конференция аясында өткен министрлік деңгейіндегі дөңгелек үстелде гендерлік теңдікті ілгерілетудегі саяси ерік-жігердің маңызы талқыланды. Сондай-ақ, туризм саласындағы әйелдер жиі кезігетін цифрлық теңсіздік пен әлеуметтік стереотиптер тақырыбында панельдік сессиялар өтті.
Centre Stage бастамасы аясында Қазақстанда 200 әйел-маманды оқыту, ақпараттық науқан жүргізу және әйел-кәсіпкерлерді қолдауға арналған арнайы шаралар әзірлеу жоспарланған.
«Әйелдер - Қазақстанда және бүкіл өңірде тұрақты туризмнің болашағын қалыптастыратын күш. Centre Stage бағдарламасы арқылы біз әйел-кәсіпкерлер мен кәсіби мамандарға қажет дағды, қолдау мен сенім ұялатып, олардың көшбасшылық әлеуетін ашуға көмектесеміз», – деді UN Tourism атқарушы директоры Зорица Урошевич.
Алматы қаласы Туризм басқармасында бұл конференцияның қала индустриясы үшін пайдасы айтылды.
«Бұл конференция жай ірі халықаралық іс-шара емес. Бұл Алматының туризмдегі тең мүмкіндіктер мен тұрақты дамуға бағытталған жаһандық қозғалысқа қосқан үлесі. Әйелдердің көшбасшылығын, олардың кәсіпкерлік әлеуетін қолдау – бүкіл саланың өсуіне стратегиялық ресурс. Конференцияның Алматыда өтуі туризм индустриясына айтарлықтай серпін беретініне сенімдіміз», – деді Алматы қаласы Туризм басқармасы басшысының орынбасары Ақмарал Ешанова.