Келесі аптада күз басталады. Осы мезгілде тұмауға қарсы екпе салынуы тиіс.
Биылғы эпидахуал жағдайында тұмауға қарсы вакцинация уақтылы өткізіле ме? Бұл сұраққа Алматы қаласының бас санитарлық дәрігері Жандарбек Бекшин жауап берді, деп хабарлайды Almaty-akshamy.kz тілшісі.
«Қазір біз 180 мың дана тұмауға қарсы вакцинаға тапсырыс беріп қойдық. Бірақ ол әлі қолымызға тиген жоқ. Тұмаудың екпесі ең алдымен «тәуекел тобына» жататын адамдарға, яғни медицина қызметкерлері, балалар үйінің тәрбиеленушілері, созылмалы ауруы барларға салынады. Жиі ауыратын адамдар алғашқы кезекте вакцина алады. «Гриппол плюс» деген ресейлік вакцина алдырамыз. Әдеттегідей, тұмауға қарсы екпе салу 1 қазанда басталады», -деді бас санитар.