2026 жылғы 3 сәуір Қазақстан-Британ техникалық университетінде Алматы қаласы Жастар саясаты басқармасының қолдауымен «Tumar KBTU» атты студенттік ұйымының жеке есептік концерті өтеді, – деп хабарлайды aqshamnews.kz тілшісі.
"Tumar Tunes" – бұл өнерге деген ортақ мақсат біріктірген «Tumar KBTU» студенттік ұйымы мүшелерінің басын қосып, біртұтас оркестр ретінде сахнаға шығатын бірегей музыкалық жобасы. Бұл кеш жас таланттардың басын қосатын кәсіби сахналық қойылым ғана емес, сонымен қатар студенттердің артистік харизмасы мен шығармашылық еркіндігін көрсететін ерекше шоу. Оркестрдің репертуары өзінің жанрлық байлығымен ерекшеленеді: мұнда қазақтың қасиетті күйлерімен қатар, әлемге әйгілі сериалдар мен анимелердің саундтректері, өшпес классикалық туындылар және драйвқа толы рок композициялары жаңаша өңдеуде орындалады.
2026 жыл еліміздің мәдени өміріндегі маңызды оқиғаларға толы. Биыл Қазақстан-Британ техникалық университеті өзінің 25 жылдық мерейтойын мақтанышпен атап өтуде. Осынау символикалық кезеңде біз ұлттық рухтың алыптары — күй құдіретін асырған Қаршыға Ахмедияровтың 80 жылдығын, вальс королі Шәмші Қалдаяқовтың 95 жылдығын, әдебиет пен өнердің бірегей тұлғалары Қабдеш Жұмаділов пен Ілияс Жақановтың 90 жылдығын, сондай-ақ бұлбұл дауысты Ермек Серкебаевтың 100 жылдық мерейтойын ерекше құрметпен еске аламыз. Осы айтулы даталар аясында «Tumar KBTU» студенттік ұйымы өзінің «Tumar Tunes» атты ауқымды есептік концертін ұсынады.
Кешке ҚБТУ, АУЭС, НАРХОЗ, KazGASA және SDU сияқты жетекші жоғары оқу орындарының талантты студенттері атсалысып, өз өнерлерін ортаға салады. Сонымен қатар, кештің мәртебелі қонақтары ретінде «Ұлытау– тобы мен Ансар Ильясов сынды танымал өнер иелері қатысып, кештің сәнін кіргізеді. Сапалы дыбыс пен кәсіби режиссурамен ұйымдастырылған бұл шара студенттер арасындағы шығармашылық ынтымақтастықты нығайтып, жас буынның артистік харизмасын паш ететін жарқын оқиға болмақ.