«Заң мен тәртіп» қағидатын ілгерілету аясында Алматы қаласы Ішкі саясат басқармасының Қоғамдық даму орталығы Қ. И. Сәтбаев атындағы ҚазҰТЗУ алаңында жастар арасында жауапты цифрлық мінез-құлықты қалыптастыруға бағытталған ашық диалог форматында «Цифрлық иммунитетті қалай қалыптастыруға болады?» атты пікірталас алаңын ұйымдастырды, – деп хабарлайды aqshamnews.kz тілшісі.
Іс-шараға Әл-Фараби атындағы Қазақ ұлттық университеті мен «Нархоз» университетінің аға оқытушылары, сондай-ақ Алатау аудандық полиция қызметкерлері қатысып, сталкингтің алдын алу, құқықтық жауапкершілік және азаматтардың қауіпсіздігін қамтамасыз ету мәселелерін талқылады.
Кездесу барысында құқық бұзушылық, адамды жүйелі түрде аңду және қудалау қылмыстық құқық бұзушылық болып табылатыны түсіндіріліп, осындай деструктивті әрекеттерден қорғану бойынша құқықтық кеңестер берілді.
Студенттер өздерін қызықтырған сұрақтарға жауап алып, құқықтық мәдениетті арттыруға бағытталған ақпаратпен танысты. Іс-шара жастар арасында заңға құрметті қалыптастыруға және құқықтық сананы дамытуға ықпал етті.
Жеткізуші: «Жаухар» ұлттық салт-дәстүрді қолдау қоры» қоғамдық қоры.