Президент Қасым-Жомарт Тоқаев бірқатар мемлекеттердегі Қазақстан елшілеріне қосымша өкілеттік беру жөнінде жарлық шығарды, - деп хабарлайды Аqshamnews.kz тілшісі.
Қазақстан Республикасының Сауд Арабиясы Корольдігіндегі Төтенше және Өкілетті Елшісі, Қазақстан Республикасының Ислам Ынтымақтастығы Ұйымы жанындағы Тұрақты өкілі Мадияр Смәділұлы Меңілбеков Қазақстан Республикасының Бахрейн Корольдігіндегі Төтенше және Өкілетті Елшісі қызметін қоса атқарушы болып тағайындалды.
Қазақстан Республикасының Португалия Республикасындағы Төтенше және Өкілетті Елшісі Жан Сержанұлы Ғалиев Қазақстан Республикасының Конго Республикасындағы Төтенше және Өкілетті Елшісі қызметін қоса атқарушы болып тағайындалды.
Мадияр Меңілбеков - 1978 жылы Жамбыл облысында туған. Триполидегі «Исламдық дағуат» университетін және Абылай хан атындағы ҚазХҚжӘТУ магистратурасын тәмамдаған. Дипломатиялық қызметін 2006 жылы бастаған. БАӘ-дегі елшілікте түрлі қызметтер атқарған, Дубайдағы Бас консул болған. Араб және ағылшын тілдерін меңгерген.
Жан Ғалиев - 1972 жылы туған. «Болашақ» бағдарламасымен Страсбург пен Парижде халықаралық қатынастар және мемлекеттік басқару бағытында білім алған. Франция, Бельгия елшіліктерінде, ЮНЕСКО жанында жұмыс істеген. 2017–2022 жылдары Қазақстанның Франциядағы елшісі болды. Француз және ағылшын тілдерін еркін меңгерген.
Жарлықтар күшіне енді.