Соңғы екі жылда Қазақстанда онкологиялық пациенттердің сәулелік терапиямен қамтылу деңгейі 60 пайызға жуықтады, деп хабарлайды aqshamnews.kz тілшісі.
Әлеуметтік желілер мен бұқаралық ақпарат құралдарында томотерапияның қолжетімділігіне қатысты мәселе мезгіл-мезгіл көтеріліп келеді. Пациенттер мен олардың жақындарының алаңдаушылығын түсінеміз, сондықтан бұл мәселеге нақты түсініктеме беруді маңызды деп санаймыз.
Ең алдымен, томотерапия – емдеудің жеке түрі емес, қазіргі заманғы қашықтықтан жүргізілетін сәулелік терапияның әдістерінің бірі. Соңғы жылдары сәулелік терапия технологиялары айтарлықтай жетілдірілді. Бүгінде бұрын томотерапиялық қондырғылардың көмегімен орындалған міндеттердің басым бөлігі соңғы буындағы заманауи сызықтық үдеткіштер арқылы жоғары деңгейде жүзеге асырылады.
Емдеу әдісін таңдау аппараттың атауына емес, халықаралық клиникалық ұсынымдарға, ісіктің орналасуына, аурудың сатысына және пациенттің жеке ерекшеліктеріне негізделеді. Тиісті шешімді мультидисциплинарлық дәрігерлер тобы қабылдайды.
«Томотерапия ешқайда жоғалған жоқ. Технологиялар мен жабдықтардың мүмкіндіктері өзгерді. Заманауи сызықтық үдеткіштер жоғары дәлдіктегі сәулелік терапияның іс жүзінде барлық спектрін жүргізуге мүмкіндік береді, ал бірқатар клиникалық жағдайларда олардың мүмкіндіктері бұдан да кең. Пациент үшін ең бастысы – аппараттың атауы емес, дұрыс таңдалған емдеу тактикасы, сапалы жоспарлау және мамандар командасының кәсібилігі», – деді ҚазОжРҒЗИ Радиациялық онкология орталығының жетекшісі, медицина ғылымдарының докторы Виктор Ким.
Бүгінде Қазақстанда медициналық көрсетілімдер бойынша сәулелік терапия қажет барлық пациенттер, оның ішінде балалар да, тегін медициналық көмектің кепілдік берілген көлемі аясында жоғары технологиялық медициналық көмекті тегін алады.
Қазіргі уақытта еліміздің барлық өңірлерінде дерлік заманауи сызықтық үдеткіштер орнатылған. Қарағанды және Семей қалаларында екіден жоғары технологиялық аппарат жұмыс істейді. Астана қаласындағы Ұлттық ғылыми онкология орталығында төрт сызықтық үдеткіш, ал қалалық онкологиялық орталықта тағы екі аппарат пациенттерге қызмет көрсетуде.
Соңғы екі жылда Қазақстанда онкологиялық пациенттердің сәулелік терапиямен қамтылу деңгейі 60 пайызға жуықтады. Бұл көрсеткіш дамыған Еуропа елдерінің деңгейіне барынша жақын.
Онкологиялық қызметті дамыту, материалдық-техникалық базаны жаңғырту және заманауи медициналық технологияларды енгізу жұмыстары жүйелі түрде жалғасуда. Негізгі мақсат – әрбір пациенттің уақтылы, сапалы, тиімді әрі қауіпсіз ем алуына жағдай жасау.
Авторлар:
Қалымова Г.Д. – ҚазОжРҒЗИ баспасөз хатшысы.
Виктор Ким – ҚазОжРҒЗИ Радиациялық онкология орталығының жетекшісі, медицина ғылымдарының докторы.